ABŞ-ın İranla davam edən nüvə danışıqları çərçivəsində daha əvvəl əldə edilmiş razılaşmalardakı məhdudiyyətlərin müddətsiz olaraq qüvvədə qalmasını istədiyi iddia edilir.
AFN.az xəbər verir ki, "Axios" xəbər saytının ABŞ rəsmisinə və mövzudan agah olan iki mənbəyə istinadən yaydığı məlumata görə, Prezident Donald Tramp administrasiyası İranla bağlanacaq hər hansı nüvə sazişinin daimi xarakter daşımasını tələb edir.
Mənbələr Trampın Yaxın Şərq üzrə xüsusi nümayəndəsi Stiv Vitkoffun özəl görüşlərin birində İranın qarşısında mühüm nüvə məhdudiyyətlərinin sona çatacağı konkret tarixin olmadığı bir müqavilə imzalamaq şərtini qoymaq niyyətini dilə gətirdiyini irəli sürüblər. Məlumata görə, Vitkoff ABŞ-ın bu yanaşmasının İranın nüvə silahı istehsal etməməklə bağlı qalıcı öhdəlik götürməsi zərurətindən qaynaqlandığını və bu vəziyyətin zamana əsaslanan məhdudiyyətləri faktiki olaraq istisna etdiyini bildirib.
Sözügedən məlumatların yayılması İran və ABŞ nümayəndə heyətlərinin İsveçrənin Cenevrə şəhərində keçiriləcək üçüncü mərhələ dolayı nüvə danışıqlarından dərhal əvvələ təsadüf edib. Tramp keçmiş prezident Barak Obamanın dövründə imzalanan və İranın nüvə proqramı ilə bağlı məhdudiyyətlərin 8-25 illik müddət ərzində mərhələli şəkildə aradan qaldırılmasını nəzərdə tutan müddəaları sərt tənqid edirdi.
ABŞ Prezidenti özünün ilk idarəçiliyi dövründə Tehran rəhbərliyinin nüvə proqramı ilə bağlı öhdəliklərinin müəyyən bir zaman kəsiyi ilə məhdudlaşdırılmasının verilən vədlərin qalıcı olmamasına yol açdığını əsas gətirərək, Obamanın imzaladığı sazişdən birtərəfli qaydada geri çəkilmişdi.
