Amerikanın "Ursa Major" şirkəti HAVOC adlı hipersəs raketi layihəsinin təfərrüatlarını açıqlayıb. Gözlənilir ki, bu raket bahalı analoqlara daha əlçatan alternativ olacaq...
Poliqon xəbər verir ki, bu barədə şirkətin baş direktoru Kris Spanyoletti Breaking Defense nəşrinə məlumat verib.
Onun sözlərinə görə, bir raketin dəyəri 3 milyon dollardan çox olmamalıdır. HAVOC hazırda on milyonlarla dollara başa gələn elit hipersəs silahları ilə ucuz mərmilər arasında orta mövqe tutacaq. Müqayisə üçün qeyd olunur ki, bir ədəd Dark Eagle raketinin qiyməti təxminən 41 milyon dollardır.
Nəşrin icmalçıları bildirirlər ki, yeniliyin əsas texniki xüsusiyyəti tənzimlənən dartı qüvvəsinə malik "Draper" maye raket mühərrikindən istifadə edilməsidir. Adətən bu tip layihələrdə tətbiq olunan birbaşa axınlı hava-reaktiv mühərriklərdən fərqli olaraq, "Ursa Major"un mühərriki atmosferin yuxarı qatlarında səmərəli işləyə bilir. Bu isə mühəndislərə mürəkkəb və bahalı istilik mühafizə sistemlərindən imtina etməyə imkan verib, nəticədə yekun qiymət azalıb və komponentlərin təchizat zənciri sadələşib.
Hazırlayıcılar bildirirlər ki, raket müxtəlif situasiyalara uyğunlaşdırıla bilər. O, həm havada, həm də yerdə eyni dərəcədə effektivdir: yerüstü buraxılış zamanı gücü əlavə sürətləndirici vasitəsilə artırılır. Raket yalnız hədəfləri vurmaqla kifayətlənmir, həm də yüksək manevr qabiliyyəti sayəsində digər düşmən hipersəs raketlərini izləyib məhv edə bilən “ovçu” kimi fəaliyyət göstərə bilər.
Məlumata görə, şirkət növbəti il ərzində əsas diqqəti raketin tələb olunan standartlara uyğunlaşdırılması layihəsinə yönəldəcək. Bu mərhələnin əsas məqsədi hipersəs sürətlərində uğurlu sınaqların keçirilməsidir. İnkişaf tempi qorunarsa, silah 3–4 il ərzində, yəni 2030-cu ilə qədər dövlət arsenalına daxil edilə bilər.
Poliqon.info
