ain.az, Olke.az portalından verilən məlumatlara əsaslanaraq xəbər verir.
Şimali Koreya lideri Kim Çen Inın 13 yaşlı qızı Kim Çju E ölkə daxilində “Raket İdarəsinin rəhbəri” funksiyasını yerinə yetirə və generallara göstərişlər verə bilər.
Ölkə.Az "The Chosun Daily"yə istinadla məlumat verir ki, kəşfiyyat orqanlarının əlində Kim Çen Inın qızının KXDR daxilində “raket idarəsinə rəhbərlik” funksiyasını icra etməsi ilə bağlı məlumatlar var.
Bildirilir ki, Kim Çen In qızını nüvə və raket sınaqlarına mütəmadi olaraq özü ilə aparır.
Məlumata əsasən, onun hərbi mühitdə öncədən möhkəmlənməsi məqsədilə “Raket İdarəsinin rəhbəri” rolu verilmiş ola bilər. Formal olaraq bu vəzifəni Çan Çxan Ha tutur, lakin kəşfiyyat məlumatlarına görə, Kim Çen Inın qızı generallardan hesabatlar qəbul edir və tapşırıqlar verir.
Fevralın 12-də Cənubi Koreyanın Milli Kəşfiyyat Xidməti parlamentdə keçirilən qapalı iclasda bunun mümkün varis hazırlığı ola biləcəyini bəyan edib.
Qurumun məlumatına görə, Kim Çen Inın qızının artıq müəyyən siyasi məsələlərlə bağlı fikir bildirdiyinə dair əlamətlər də var.
Rəsmi qurumlar fevralın 19-dan Pxenyanda keçirilən Koreya Fəhlə Partiyasının IX qurultayında bununla bağlı hər hansı siqnalların ortaya çıxıb-çıxmayacağını diqqətlə izləyir.
Qeyd olunur ki, Şimali Koreya mediası Kim Çen Inın qızını ilk dəfə 2022-ci ilin noyabrında – “Xvason-17” qitələrarası ballistik raketinin buraxılışı zamanı rəsmi şəkildə nümayiş etdirmişdi. Həmin vaxt o, “sevimli qız” kimi təqdim olunsa da, adı açıqlanmamışdı.
Xatırladaq ki, Kim Çen Inın öz adı da uzun müddət mətbuatda çəkilməyib. O, yalnız 2010-cu ilin sentyabrında rəsmi şəkildə varis kimi təqdim olunmuşdu.
Daha əvvəl KXDR-in Şərq (Yapon) dənizi istiqamətində bir neçə ballistik raket buraxdığı bildirilmişdi. Cənubi Koreya hərbçilərinin məlumatına görə, raketlər təxminən 900 kilometr məsafə qət edib. Bu, 2026-cı ildə KXDR-in ilk silah sınaqları olub.
2025-ci ilin payızında isə Kim Çen In qızı ilə birlikdə KXDR Hərbi Hava Qüvvələrinin 80 illiyi münasibətilə təşkil olunan aviaşounu ziyarət etmişdi.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
