Misli Premyer Liqasının 14-cü turundan təxirə salınan "Qəbələ" və "Turan Tovuz" klubları üz-üzə gəlib. Qarşılaşma Tovuz təmsilçisinin 3:0 hesablı qələbəsi ilə başa çatıb.
QOL.az xəbər verir ki, "Qəbələ" klubunun baş məşqçisi Kaxaber Sxadadze matçdan sonra oyun barədə fikirlərini bölüşüb.
Mütəxəssis məğlubiyyəti oyunun erkən dəqiqələrində buraxılan qollarla əlaqələndirib və rəqibin müdafiə səddini yarmağın çətinliyindən danışıb:
"Oyun haqqında çox geniş danışmağa ehtiyac duymuram. İlk növbədə "Turan Tovuz"u qələbə münasibətilə təbrik edirəm. Matça çox pis başladıq və hələ ilk dəqiqələrdə qapımızda iki qol gördük. "Turan Tovuz" kimi təcrübəli komandaya qarşı belə bir başlanğıcdan sonra vəziyyəti düzəltmək olduqca çətindir. İkinci qoldan sonra bir neçə şansımız yaransa da, təəssüf ki, onlardan yararlana bilmədik. Əgər fərqlənə bilsəydik, bəlkə də oyun fərqli məcrada davam edərdi. İkinci hissənin əvvəlində öz qapımıza vurduğumuz qoldan sonra isə komanda tamamilə oyundan qopdu. Rəqib müdafiədə çox diqqətli çıxış edir, onların intizamlı müdafiə xəttini yarmaq çox çətin idi".
Sxadadze heyətdəki rotasiyaların zəruriliyini və futbolçuların fərdi məsuliyyətini xüsusi vurğulayıb:
"Bizim üçün hər oyun vacibdir, lakin "Karvan-Yevlax"la keçiriləcək növbəti matçın final xarakteri daşıdığı aydındır. Prins Ovusu kimi gənc oyunçuların həddindən artıq yüklənməsi bəzən rotasiyanı qaçılmaz edir. Dörd gündən bir meydana çıxmaq asan deyil və belə sıx qrafikdə heyətdə dəyişikliklər etməliyik. Start heyətində şans qazanan futbolçular bunu özlərini göstərmək üçün bir fürsət kimi dəyərləndirməlidirlər.
Təəssüf ki, bəziləri bu gün etimadı doğrultmadı. Bütün mövsümü yalnız 11 nəfərlə keçirmək mümkün deyil. Məsələn, kapitan Murad Musayev ötən matçı buraxsa da, bu gün müdafiədə ən səhvsiz oyunçularımızdan biri idi. Hər kəs öz üzərində bu cür işləməli və komandaya fayda verməlidir".
Baş məşqçi turnir cədvəlinin son sıralarında qərarlaşan növbəti rəqibi "Karvan-Yevlax"a da ciddi yanaşdıqlarını bildirib:
"Bütün rəqiblərə hörmətlə yanaşırıq. Heç vaxt iddia edə bilmərəm ki, biz "Karvan-Yevlax"dan mütləq güclüyük. Onlar da mübarizə aparan, çalışan yaxşı kollektivdir. Turnir cədvəlində xallarının az olmasına baxmayaraq bizi çox ciddi və gərgin bir qarşılaşma gözləyir".
