Buxarest, 24 fevral, AZƏRTAC
Rumıniya və Moldova ərazisində fevralın 24-də qeyd olunan Draqobete bayramı sevgi və gənclik rəmzi kimi dərin köklərə malikdir.
AZƏRTAC xəbər verir ki, bu bayramın qeyd edilməsi ənənəyə çevrilib. Bu gün insanlar arasında “Sevgililər günü” kimi qiymətləndirilir, xüsusilə, qarşılıqlı münasibətlər, ailə bağları və romantik münasibətlərin təntənəsi ilə assosiasiya olunur.
Tarixi mənbələr göstərir ki, Draqobete, adətən, qədim folklor ənənələrinə əsaslanır və etnoqrafik tədqiqatlarda onun köklərinin slavyan və rumın mədəniyyətləri ilə bağlı olduğu qeyd edilir. Bu gün gənclər, adətən, təbiətə çıxır, baharın gəlişini salamlamaq, sevgi arzularını simvolizə etmək üçün ənənəvi ritual və mərasimlərdə iştirak edirlər.
Ənənəyə görə, Draqobete günü sevən cütlüklər bir-birlərinə hədiyyələr və şirniyyatlar verirlər. Gənclər bəzi bölgələrdə, xüsusilə, kənd yerlərində bir araya gələrək, müxtəlif rəqslər və mahnılar vasitəsilə romantik hislərini nümayiş etdirirlər. Bu gün, həmçinin dostluq, hörmət və qarşılıqlı anlaşma mesajlarını da özündə ehtiva edir.
Müasir dövrdə Draqobete, xüsusilə, şəhər mədəniyyətində yaşayan gənclər və ailələr tərəfindən qeyd olunur. Bu bayram sosial media və ictimai tədbirlərdə də öz əksini taparaq, insanların bir-biri ilə sevgi münasibətlərini və onun dəyərini yenidən düşünməsinə stimul verir.
Qeyd edək ki, Draqobete bayramı Rumıniya və Moldova xalqının zəngin mədəni irsinin hissəsi olmaqla, gələcəyə yönəlik ümid, sevgi və ünsiyyət mesajlarını yaşatmağa xidmət edir.
İqbal Hacıyev
AZƏRTAC-ın xüsusi müxbiri
Buxarest
