"Ana harayı" abidəsi ətrafında son hazırlıq - FOTOREPORTAJ

BAKI, 24 fevral. TELEQRAF

Xocalı soyqırımının 34 ildönümü ilə əlaqədar paytaxtın Xətai rayonundakı “Ana harayı” abidəsinin yerləşdiyi parkda hazırlıq işləri yekunlaşmaq üzrədir.

Teleqraf xəbər verir ki, anım günü ilə bağlı abidə və abidənin yerləşdiyi park- xiyabanda yerləşən işıq dirəkləri, söhbətgahlar, oturacaqlar və məhəccərlər rənglənib.

Bəzi yararsız hala düşmüş ot örtükləri yenilənib. Bütün Xiyabanboyu mövsümü güllər və dekorativ kollar əkilib. Xocalı prospekti boyu işıq dirəklərinə "Xocalıya ədalət" plakatları vurulub.

Azərbaycan xalqının qan yaddaşı olan Xocalı soyqırımına həsr olunan “Ana harayı” abidə kompleksi 1993-cü ildə inşa edilib. Hər il fevralın 26-da minlərlə insan abidəni ziyarət edir.

Xatırladaq ki, 1992-ci il fevralın 25-dən 26-na keçən gecə erməni təcavüzkarları Azərbaycanın Xocalı şəhərində bəşəriyyət tarixində ən qanlı faciələrlə bir sırada duran soyqırımı törədiblər. Həmin kütləvi qırğın nəticəsində 106-sı qadın, 63-ü uşaq, 70-i qoca olmaqla 613 nəfər amansızlıqla qətlə yetirilib, 487 nəfər şikəst olub, 1275 dinc sakin girov götürülüb.

• Mədəniyyət
• Park
• Hazırlıq Işləri
• Abidə
• Xocalı Soyqırımı
• Ana Harayı