Cinsəlliyin yaşı varmı? Cinsi həyat nə vaxt bitir? “Bu yaşdan sonra nə cinsəllik?”, “Neçə yaşı var, hələ də seks dalınca qaçır!”...
Bu cümlələr sizə də tanış gəlirmi? Sanki cinsəllik yalnız gənc bədənlərin haqqıdır. Yaş artdıqca insan cinsi həyatdan da “təqaüdə çıxmalıdırmı”?
Bəs doğrudanmı cinsəlliyin müəyyən yaşı var, yoxsa nəfəs aldığımız müddətcə bu ehtiyac da həyatımızın təbii hissəsi olaraq qalır?
"Yeni Sabah"a xəbər verir ki, dosent doktor Süleyman Eserdağa görə, cinsəllik – insanın təbii ehtiyacıdır.
Cinsəllik yemək, içmək, yatmaq qədər təbii və əsas ehtiyacdır. İnsanı digər canlılardan fərqləndirən əsas cəhətlərdən biri də cinsəlliyi yalnız instinkt yox, eyni zamanda duyğularla yaşamasıdır. İnsanlar sadəcə çoxalmaq üçün deyil, yaxınlıq, sevgi və bağlılıq üçün də cinsi münasibət qururlar.
Sağlam cinsi həyat həm fiziki, həm də psixoloji sağlamlığa müsbət təsir göstərir. Eyni zamanda cütlüklər arasında sevgi, bağlılıq və sədaqətin möhkəmlənməsində mühüm rol oynayır. Cinsi münasibət zamanı ifraz olunan oksitosin hormonu “bağlanma hormonu” kimi tanınır və tərəflər arasında emosional yaxınlığı artırır.
Cinsi həyat neçə yaşa qədər davam edə bilər?
“Yaşlı insanların cinsi istəyi problem sayılırmı?”
“70 yaşlı bir insanın cinsi münasibət istəməsi anormaldırmı?”
Cəmiyyətimizdə müəyyən yaşdan sonra qadın və ya kişinin cinsi istəyi bəzən “ayıb”, “uyğunsuz”, hətta “xəstəlik” kimi qiymətləndirilir. Halbuki insan hansı yaşda olmasından asılı olmayaraq cinsi istək duyursa, bu tamamilə normaldır.
Yaş artdıqca bəzi fizioloji dəyişikliklər baş verə bilər, lakin bu, cinsi həyatın bitməsi demək deyil.
Menopoz və qadınlarda dəyişikliklər
Qadınlarda menopoz dövründə hormon səviyyəsində ciddi azalmalar müşahidə olunur. Bu isə:
* vaginal quruluq,
* həssaslığın azalması,
* gec oyanma,
* orqazma çatmada çətinlik,
* cinsi əlaqə zamanı ağrı
kimi problemlərə səbəb ola bilər.
Vaginal quruluq bəzən o qədər güclü olur ki, cinsi əlaqə ağrılı və narahatedici hala gəlir. Halbuki sağlam cinsi münasibətdə ağrı olmamalıdır. Sevindirici haldır ki, bu problemlərin müalicəsi mümkündür. Müalicə olunmadıqda isə qadınlarda zamanla cinsi istəksizlik və münasibətdən yayınma yarana bilər.
Əksinə, menopoz dövründə və sonrasında davamlı və nizamlı cinsi həyatın bir sıra faydaları var.
İrəli yaşda cinsəllik faydalıdırmı?
Araşdırmalar göstərir ki, 60 yaşdan yuxarı aktiv cinsi həyatı olan insanlarda yaşla əlaqədar depressiya daha az müşahidə olunur. Cinsi münasibət zamanı ifraz olunan hormonlar təbii “antidepressant” təsiri göstərir.
50 yaşdan yuxarı qadınlarda aktiv cinsi həyat:
* çanaq orqanlarının sallanmasının,
* sidik qaçırma problemlərinin
daha az görülməsi ilə əlaqələndirilir.
Kişilərdə yaşlanma və cinsi istək
Kişilərdə də yaş artdıqca testosteron səviyyəsi azala bilər. Bu isə:
* cinsi istəyin azalması,
* ereksiya (sərtləşmə) problemləri,
* boşalma pozuntuları
ilə müşayiət oluna bilər.
Müasir tibbdə bu problemlərin müalicəsi üçün müxtəlif dərman və terapiya üsulları mövcuddur.
Vacib məqam: Ereksiya problemi bəzən damar sərtləşməsinin erkən əlaməti ola bilər. Buna görə də yaşlı kişilərdə qəfil başlayan sərtləşmə problemi kardioloq müayinəsini tələb edir.
Eyni zamanda araşdırmalar göstərir ki, aktiv cinsi həyatı olan yaşlı kişilərdə ürək-damar xəstəlikləri daha az rast gəlinir.
Tərəfdaşınız istəmirsə?
İrəli yaşlarda tərəflərdən birində istəksizlik yarana bilər. Bu isə digər tərəf üçün emosional gərginlik yarada bilər. Belə hallarda:
* hormonal problemlərin,
* damar xəstəliklərinin,
* depressiyanın
araşdırılması vacibdir.
Kök səbəb aradan qaldırıldıqda sağlam cinsi həyat bərpa oluna bilər. Hormon dəstəyi, dərman müalicəsi və cinsi terapiya effektiv nəticələr verir.
İrəli yaşda cinsəllik ayıb deyil
“Bu yaşda olmaz”, “günahdır”, “uyğun deyil” kimi düşüncələr insanlarda günahkarlıq və utanc hissi yarada bilər. Halbuki cinsi istək insanın ən təbii ehtiyaclarından biridir.
Yaş artdıqca sevgi ehtiyacı azalırmı? Yaxınlıq istəyi yox olurmu? Əlbəttə ki, yox.
Cinsi münasibətin tezliyi nə qədər olmalıdır?
Bu sualın konkret cavabı yoxdur. Əsas meyar qarşılıqlı razılıqdır. Həftədə 2–3 dəfə və ya daha az – fərq etməz. İş həyatı, stress, yorğunluq və digər faktorlar tezliyə təsir göstərə bilər.
Sağlam cinsəllik ömrü uzadır
Elmi araşdırmalar göstərir ki, nizamlı və məmnunedici cinsi həyata sahib olan insanlar daha xoşbəxt və daha uzunömürlü olur.
Cinsəllik yalnız gənclərin deyil. Hər yaşın öz ritmi, öz həzzi və öz yaxınlıq forması var. Əsas məsələ yaş deyil – sağlamlıq, qarşılıqlı istək və sevgi bağının qorunmasıdır.
Həyatı dolu-dolu yaşamaq istəyiriksə, yaşımıza baxmadan, sağlam şəkildə və qarşılıqlı hörmət çərçivəsində cinsəlliyi həyatımızın təbii bir hissəsi kimi qəbul etməliyik.
Telegram kanalımız
