Xüsusi emosional yük daşıyan yeni musiqi layihəsi üzərində işlər yekunlaşmaq üzrədir. Layihə dərin məna çaları, səmimi təqdimatı və peşəkar yanaşması ilə seçilir. Onun yaxın günlərdə ictimaiyyətə təqdim olunması planlaşdırılır.
Bu barədə açıqlamasında layihənin bəstəkarı Sevinc Tofiqqızı məlumat verib. O bildirib ki, klipin rejissoru Xalid Əliyevdir. Çəkiliş prosesi rejissorun peşəkar komandası ilə böyük həvəs və yüksək məsuliyyət hissi ilə həyata keçirilib.
Bəstəkarın sözlərinə görə, yaradıcılıq mərhələsində hər detal incəliklə işlənib və bu yanaşma layihənin ümumi keyfiyyətinə, emosional təsir gücünə xüsusi töhfə verib:
“Yaradıcılıq prosesində hər detalın incəliklə işlənməsi layihənin ümumi keyfiyyətinə xüsusi təsir göstərib. Layihədə 3 nömrəli Uşaq Gənclər İnkişaf Mərkəzinin istedadlı tələbələrindən ibarət “Azəri İnciləri” vokal qrupu da yer alıb. Qrupun rəhbəri Gülnarə Qurbanovadır. Gənc ifaçıların səmimiyyəti, enerjisi və səhnə mədəniyyəti layihəyə əlavə ruh qataraq emosional atmosferi gücləndirib.”
Sevinc Tofiqqızı qeyd edib ki, komanda üzvləri layihənin yüksək səviyyədə reallaşdırılmasını birgə əməyin və peşəkarlığın nəticəsi kimi qiymətləndirirlər:
“Bu layihədə əməyi keçən hər kəsə minnətdarlıq bildiririk. Çəkiliş üçün yaradılan şəraitə, göstərilən dəstəyə görə Azərbaycan Hava Yollarına (AZAL) təşəkkür edirik. Təqdimat mərasimi yaxın günlərdə baş tutacaq və layihə rəsmi şəkildə ictimaiyyətə təqdim olunacaq.”
