Rusiya qalib gəlməyə bilər, amma sülh Kremlə məğlubiyyət kimi görünəcək.
QHT.az xəbər verir ki, Böyük Britaniyada nəşr olunan nüfuzlu beynəlxalq həftəlik jurnal - “The Economist” yazır ki, Vladimir Putin Ukraynadakı ambisiyalarının tələsinə düşüb və müharibəni nə asanlıqla davam etdirə, nə də qələbə əldə etmədən dayandıra bilir. Nəşrə görə, sülh danışıqlarının çıxış yolu olacağına dair gözləntilər getdikcə azalır. Hətta mümkün razılaşma belə Rusiya daxilində iqtisadi və siyasi qeyri-sabitlik yarada bilər. Məqalədə qeyd olunur ki, Rusiyanın dörd il ərzində Ukraynada əldə etdiyi ərazi qazancı çox məhduddur və cəbhədə ciddi dönüş gözlənilmir. Dronların geniş istifadəsi Rusiya ordusunun say üstünlüyündən effektiv istifadə etməsinə mane olur. Eyni zamanda, Rusiya böyük itkilər verir və yeni əsgərlərin cəlb edilməsi getdikcə çətinləşir.
İqtisadi vəziyyət də mürəkkəbləşir: hərbi xərclər ÜDM-in təxminən 8 faizini təşkil edir, mülki sektor isə böhran yaşayır. Müharibənin dayandırılması hərbi sənayenin zəifləməsinə və iqtisadi çətinliklərin dərinləşməsinə səbəb ola bilər. Bundan əlavə, cəbhədən qayıdacaq yüz minlərlə əsgərin məşğulluğu problemi yaranacaq.
Nəşr hesab edir ki, müharibənin davamı da, dayandırılması da Kreml üçün ciddi risklər yaradır və həm Rusiya, həm də Ukrayna uzunmüddətli münaqişə tələsində qala bilər.
R.İmanov
