Diversiya iştirakçılarının maliyyəni Ukraynadan olan şəxsi sponsor vasitəsilə təmin etdiyi iddia olunur...
Poliqon xəbər verir ki, Almaniyanın Der Spiegel nəşri “Şimal axını” və “Şimal axını–2” qaz kəmərlərində baş verən partlayışlarla bağlı yeni təfərrüatlar açıqlayıb. Nəşrin mənbələrə istinadən yaydığı məlumata görə, diversiyaların təşkilatçıları ABŞ-nin dəstəyi olmadan, müstəqil şəkildə fəaliyyət göstəriblər.
Məlumatda bildirilir ki, əməliyyatın maliyyələşdirilməsi üçün Ukraynadan olan naməlum bir şəxsi sponsor tapılıb. Həmin sponsor partlayışın həyata keçirilməsi üçün lazım olan avadanlıq, qayıq icarəsi və partlayıcı maddələrin alınmasına çəkilən təxminən 300 min dollar xərclərin böyük hissəsini qarşılayıb.
Nəşrin yazdığına görə, CIA ilkin mərhələdə qaz kəmərlərinə qarşı mümkün diversiya planları barədə məlumatlı olub. Lakin xəbərdarlıqlara baxmayaraq, əməliyyatı həyata keçirən şəxslər planlarını dəyişməyərək müstəqil şəkildə hərəkət etmək qərarına gəliblər.
Xatırladaq ki, “Şimal axını” və “Şimal axını–2” qaz kəmərlərində partlayışlar 26 sentyabr 2022-ci ildə baş verib. Hadisə zamanı “Şimal axını” üzrə qaz nəqli texniki xidmət səbəbindən dayandırılmışdı, “Şimal axını–2” isə hələ kommersiya istismarına verilməmişdi.
Partlayışlar nəticəsində dörd xəttdən üçü ciddi zədələnib. Layihənin operatoru olan Nord Stream AG dağıntıların misli görünməmiş xarakter daşıdığını bildirib və kəmərlərin bərpa müddəti ilə bağlı hər hansı proqnoz verməkdən imtina edib.
Ekspertlər qeyd edirlər ki, hadisə Avropanın enerji təhlükəsizliyinə ciddi təsir göstərib və geosiyasi gərginliyi daha da artırıb. Partlayışların təşkilatçıları və sifarişçiləri ilə bağlı beynəlxalq araşdırmalar isə hələ də davam edir.
Poliqon.info
