Bakı, 18 fevral, AZƏRTAC
İspaniyanın Uelva əyaləti 2026-cı ildə çiyələk məhsulunun yığımı üçün Mərakeşdən minlərlə mövsümi işçi qəbul edəcək.
AZƏRTAC Mərakeşin “Akhbarona” qəzetinə istinadla xəbər verir ki, bu proses Mərakeş ilə İspaniya arasında dövri miqrasiya sahəsində bağlanmış əməkdaşlıq haqqında sazişlərin bir hissəsidir. Bu sazişlər İspaniya fermerlərinin ixtisaslı işçi qüvvəsinə olan tələbatının ödənilməsinə, həmçinin Mərakeşin Məşğulluğun təşviqi və peşə hazırlığı üzrə milli agentliyi tərəfindən yoxlanılan və nəzarət edilən minlərlə mərakeşli qadına qanuni məşğulluq imkanlarının təqdim olunmasına yönəlib.
Bu kampaniya Rabat ilə Madrid arasında iqtisadi və sosial əməkdaşlığın ən mühüm sütunlarından biridir. Belə ki, bu, bir tərəfdən Uelva regionunun yerli iqtisadiyyatının dəstəklənməsinə töhfə verir, digər tərəfdən isə Mərakeşin müxtəlif kənd rayonlarından olan qadın işçilərin maliyyə gəlirlərinin artmasına kömək edir.
