Azpolitika.az portalından əldə olunan məlumata əsasən, ain.az xəbər verir.
Rusiya, ABŞ və Ukrayna arasında Cenevredə keçirilən danışıqlar başa çatıb.
“AzPolitika” xəbər verir ki, Rusiya nümayəndə heyətinə rəhbərlik edən Vladimir Medinskinin mətbuata açıqlamasına görə, ABŞ və Ukrayna ilə danışıqlar "çətin, lakin işgüzar" keçib. O bildirib ki, növbəti görüş tezliklə baş tutacaq: "Bildiyiniz kimi, danışıqlar iki gün davam edib: dünən müxtəlif formatlarda çox uzun müddət, bu gün isə təxminən iki saat davam edib".
Ukrayna lideri Volodimir Zelenski isə deyib ki, Cenevrədə keçirilən Ukrayna-ABŞ-Rusiya danışıqları iki sahəyə - hərbi və siyasi sahəyə yönəlib və bütün tərəflər konstruktiv hərbi əməkdaşlıq nümayiş etdiriblər.
“Siyasi iradə varsa, hərbçilər atəşkəs rejimini və müharibənin bitməsini necə izləməli olduqlarını başa düşürlər. Onlar orada demək olar ki, hər şey barədə razılığa gəliblər. Monitorinqdə mütləq Amerika tərəfi iştirak edəcək. Hesab edirəm ki, bu, konstruktiv bir siqnaldır”, - deyə Zelenski qeyd edib.
Siyasi komponentə gəldikdə isə Ukrayna liderinin sözlərinə görə, danışıqlarda həssas məsələlər müzakirə olunub.
“Görürük ki, inkişaf var, amma hələlik mövqelər fərqlidir, çünki danışıqlar çətin keçib. Buna görə də mənim qrupum bütün bu nüansları mənimlə bölüşəcək. Beləliklə, həm hərbi cəbhədə, həm də siyasi cəbhədə irəliləyişlər eşitdim... yaxşı, dialoq oldu. İrəliləməyə razılaşdıq, davam etməyə razılaşdıq. Bununla yanaşı, danışıqlarda, xüsusən də Donbass və Zaporojye AES ilə bağlı son iki gündə heç bir irəliləyiş olmayıb”, - deyə Zelenski əlavə edib və danışıqlar qrupunun telefonla müzakirə edə bilmədiyi məsələlərin olduğunu bildirib.
Ukrayna Milli Təhlükəsizlik və Müdafiə Şurasının katibi Rüstəm Umerov isə danışıqlardan sonra qısa bir açıqlama verərək onları "intensiv və hərtərəfli" adlandırıb: "Həm siyasi, həm də hərbi bloklardan olan nümayəndə heyətləri təhlükəsizlik parametrlərini və potensial həllərin tətbiqi mexanizmlərini müzakirə etdilər. Bir sıra məsələlər aydınlaşdırıldı, digərləri isə əlavə koordinasiya üçün saxlanıldı... İrəliləyiş əldə edilir, lakin bu mərhələdə heç bir detalı açıqlaya bilmərik... Ukrayna konstruktiv mövqe tutur; onun əsas məqsədi dəyişməz olaraq qalır - ədalətli və davamlı sülh".
C.Məmmədli
“AzPolitika.info”
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
