BAKI, 18 fevral. TELEQRAF
“Krokus Siti Holl”da 149 nəfərin ölümü ilə nəticələnən terror aktı ilə bağlı cinayət işi üzrə təqsirləndirilən şəxslər və onların müdafiəçiləri, terror aktını bilavasitə törədən dörd nəfər istisna olmaqla, məhkəmə mübahisələri zamanı 2-ci Qərb Hərbi Dairə Məhkəməsindən mərhəmət göstərilməsini və dövlət ittihamının tələb etdiyindən daha yüngül cəza təyin olunmasını xahiş edəcəklər.
Teleqraf xəbər verir ki, bu barədə TASS agentliyinə proses iştirakçılarından biri məlumat verib.
Onun sözlərinə görə, təqsirləndirilənlər və onların vəkilləri hesab edirlər ki, terror aktının digər iştirakçılarına münasibətdə prokurorluğun tələb etdiyi cəzalar həddindən artıq sərt və əsassızdır. Bildirilir ki, onlar məhkəmə mübahisələrində və son söz zamanı, “Krokus Siti Holl”da planlaşdırılan terror aktından, onun həyata keçirilmə üsulundan və nəticələrindən xəbərsiz olduqlarını əsas gətirərək, məhkəmədən mərhəmət və daha yüngül cəza istəyəcəklər.
Daha əvvəl zərərçəkənlərin vəkili Daniyel Gotye TASS-a bildirib ki, təqsirləndirilənlərin son söz deməsi üçün onlara söz veriləcək növbəti iclaslar fevralın 18 və 19-na planlaşdırılıb. Onun sözlərinə görə, 19 təqsirləndirilən şəxs barəsində hökmün, prokurorların onlardan 15-i üçün ömürlük həbs cəzası istədiyi bu iş üzrə, 22 mart 2024-cü ildə baş vermiş faciənin ildönümünə yaxın elan ediləcəyi gözlənilir.
Baş Prokurorluğun məlumatına əsasən, ittiham tərəfi dörd birbaşa icraçı da daxil olmaqla 15 təqsirləndirilən şəxsə ömürlük azadlıqdan məhrumetmə cəzası verilməsini təklif edib. Daha dörd nəfər üçün isə 19 il 11 aydan 22 il 10 ayadək həbs cəzası istənilib.
Bundan əlavə, dövlət ittihamı terror aktını törədənlərdən biri olan Şamsiddin Fariduninin qohumları – İsroil İslomov və onun oğulları Dilovar və Aminconun Rusiya vətəndaşlığından məhrum edilməsi məsələsinə baxılmasını xahiş edir. Prokuror, həmçinin terror aktının dörd icraçısına cinayətdən əvvəl yaşadıqları mənzili icarəyə verən Əlişer Kasımovun da Rusiya vətəndaşlığından məhrum edilməsini və həmin mənzilin dövlət xeyrinə müsadirə olunmasını tələb edir. İş üzrə bütün 19 şəxs Rusiyada terrorçular siyahısına daxil edilib.
