Bifokal eynəklərin bir neçə əsr əvvəl Benjamin Franklin tərəfindən icad edildiyi hesab olunur. Lakin Cənubi Amerika və Meksikada yaşayan "Thermonectus marmoratus" adlı su böcəyinin sürfəsi daha qədim “ixtiraçı” sayıla bilər.
Hit.az-ın məlumatına görə, "Discover Wildlife" nəşri yazır ki, bu canlı təbii bifokal görməyə malik olduğu bilinən yeganə heyvandır.
Materialda qeyd olunur ki, 12 gözü və ovunu parçalara ayıra bilən güclü dişləyici-kəsici ağız aparatları ilə bu “günəş şüası” böcəyinin ovçuluq bacarığı onun görmə qabiliyyəti ilə daha da artır.
Bu xüsusiyyət xüsusilə böcəyin ən böyük dörd gözündə özünü göstərir. İrəliyə yönəlmiş uzun, boruvari quruluşlu bu gözlər ona ağcaqanad kimi ovları uzaq məsafədən izləməyə və hücum üçün kifayət qədər yaxınlaşdıqda dəqiq fokuslanmağa imkan verir.
Bundan əlavə, hər linzanın arxasında biri digərinin arxasında yerləşən iki işığahəssas tor qişa mövcuddur. Bu isə böcəyə fokusunu dəyişmədən eyni anda həm ön, həm də arxa planı görməyə şərait yaradır.
"Discover Wildlife" nəşrində qeyd olunur: “Bu, təbiətdə bəlkə də ən gözəl böcəkdir – bir çox mənada”.
Samir
