BMT-nin baş katibi Antonio Quterreş İsrail hökumətinin İordan çayının qərb sahilində torpaq qeydiyyatı prosedurlarını bərpa etmək qərarını kəskin şəkildə pisləyib.
AFN.az xəbər verir ki, Baş katibin ofisindən verilən rəsmi bəyanatda bu addımın fələstinlilərin mülkiyyət hüquqlarından məhrum edilməsinə və İsrailin bölgədəki nəzarətinin qeyri-qanuni şəkildə genişlənməsinə yol açacağı bildirilib.
Quterreş vurğulayıb ki, Şərqi Qüds də daxil olmaqla İordan çayının qərb sahilindəki bütün İsrail məskunlaşmaları beynəlxalq hüququn kobud pozuntusudur və heç bir hüquqi qüvvəyə malik deyil. Onun sözlərinə görə, bu cür tədbirlər vəziyyəti qeyri-sabitləşdirir və "iki dövlət" prinsipi əsasında münaqişənin həlli perspektivlərini sarsıdır.
Qeyd edək ki, İsrail hökuməti 1967-ci ildən bəri ilk dəfə olaraq İordan çayının qərb sahilində (xüsusilə C zonasında) torpaqların qeydiyyatı prosesinə başlamağı təsdiqləyib. İsrail tərəfi bu qərarın fələstinlilərin "qanunsuz məskunlaşma fəaliyyətlərinə" cavab olduğunu və hüquqi mübahisələri şəffaflaşdıracağını iddia edir.
Lakin Fələstin rəhbərliyi və Misir, Qətər, İordaniya kimi ölkələr bunu ərazilərin faktiki ilhaqı kimi qiymətləndirərək beynəlxalq müdaxiləyə çağırıblar.
