iPhone 18 Pro modelində 5 əsas yenilik olacaq » AzadMedia.az

GF Securities investisiya şirkətinin analitiki Jeff Pu Apple-ın 2026-cı ildə təqdim etməsi gözlənilən iPhone 18 Pro və iPhone 18 Pro Max modelləri ilə bağlı yeni proqnozlarını açıqlayıb. Analitikin sözlərinə görə, şirkət mövcud Pro modellərlə müqayisədə beş əsas yenilik üzərində işləyir.

Məlumata əsasən, ən diqqətçəkən dəyişiklik Dynamic Island-ın ölçüsünün kiçildilməsi olacaq. Bildirilir ki, Apple Face ID sisteminin bəzi komponentlərini ekran altına yerləşdirməyi planlaşdırır. Bu isə ön paneldə daha geniş istifadə sahəsi yaradacaq və dizaynı demək olar ki, çərçivəsiz görünüşə yaxınlaşdıracaq.

Digər mühüm yenilik əsas kamerada tətbiq ediləcək. 48 meqapiksellik obyektiv mexaniki olaraq tənzimlənən – dəyişən diafraqma sistemi ilə təchiz oluna bilər. Bu texnologiya işıq şəraitindən asılı olaraq obyektivin açılışını dəyişməyə imkan verəcək. Nəticədə parlaq gün işığında kölgə detalları daha aydın görünəcək, portret çəkilişlərdə fon daha təbii bulanıqlaşdırılacaq, zəif işıq şəraitində isə görüntüdə səs-küy azalacaq.

Jeff Pu həmçinin bildirib ki, yeni model 2 nanometrlik texnoloji proses əsasında hazırlanacaq A20 Pro çipi ilə təchiz ediləcək. Çipin ehtimal ki, TSMC tərəfindən istehsal olunacağı qeyd edilir. 3 nanometrlik əvvəlki nəsillə müqayisədə 2 nm texnologiya 10–15 faiz performans artımı və daha yüksək enerji səmərəliliyi vəd edir. Bu isə həm batareya ömrünün uzanmasına, həm də süni intellekt funksiyalarının daha sürətli işləməsinə şərait yarada bilər.

Bundan əlavə, cihazın simsiz bağlantı modulları da yenilənəcək. Wi-Fi və Bluetooth üçün N2 çipinin tətbiqi, həmçinin Apple-ın daxili 5G modeminin C2 versiyası ilə əvəzlənməsi planlaşdırılır. Yeni modulların daha stabil siqnal, enerji qənaəti və Wi-Fi 7 ilə təkmilləşdirilmiş mmWave 5G dəstəyi təqdim edəcəyi bildirilir.
Mənbələrin məlumatına görə, iPhone 18 Pro və iPhone 18 Pro Max modellərinin 2026-cı ilin sentyabrında təqdim olunması gözlənilir. Standart iPhone 18 modelləri isə ayrıca tədbirdə – 2027-ci ilin əvvəlində elan oluna bilər.

Qeyd olunur ki, açıqlanan məlumatlar analitik proqnozlara əsaslanır və son texniki xüsusiyyətlər yalnız rəsmi təqdimat zamanı təsdiqlənəcək.