Böyük Britaniya hökuməti 2026-cı ildə İngiltərənin onlarla şurasında keçirilməsi planlaşdırılan yerli seçkilərin təxirə salınması planlarından daşınıb.
AFN.az "Financial Times"a istinadən xəbər verir ki, Yaşayış Tikintisi, İcmalar və Yerli İdarəetmə Nazirliyinin yaydığı bəyanatda hüquqi rəyə əsaslanaraq may ayında keçiriləcək 30 regional seçkinin təxirə salınması barədə ilkin qərarın ləğv edildiyi bildirilib. Nazirlər Kabineti əvvəlcə bu addımı yerli idarəetmə sistemindəki islahatlarla əsaslandıraraq, tezliklə ləğv ediləcək və ya yenidən qurulacaq şuralar üçün səsvermənin məqsədəuyğun olmadığını iddia edirdi.
Qəzetin təhlilinə görə, bu təxirəsalma Baş nazir Keyr Starmerin rəhbərlik etdiyi hakim Leyboristlər Partiyasına təxminən 200 seçilmiş nümayəndənin təmsil olunduğu 10-a yaxın şuranı daha bir il nəzarətdə saxlamağa imkan verə bilərdi. Lakin sağçı "Reform UK" partiyası başda olmaqla müxalifət bu planı kəskin tənqid edib və məsələni məhkəməyə daşıyıb.
"Sky News" telekanalı qeyd edir ki, bu geri addımla birlikdə, cəmi 19 aydır hakimiyyətdə olan leyboristlər hökumətinin əvvəlki qərarlarından imtina etmə halları 15-ə çatıb. Maraqlıdır ki, hökumət bu qərarı Starmerin mövqeyini bir daha dəyişməyəcəyinə dair vədindən cəmi bir neçə saat sonra açıqlayıb.
