Abşeron Rayon Məhkəməsində qəsdən sağlamlığa yüngül zərər vurmada təqsirləndirilən Zahid Xəlilzadənin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Firuzə Kərimovanın sədrliyi ilə keçirilən prosesdə hökm oxunub.
Məhkəmənin hökmü ilə “Konstitusiya və Suverenlik İli” münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci maddəsi tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib. Onun barəsində seçilmiş başqa yerə getməmək barədə iltizam qətimkan tədbiri ləğv olunub.
İttiham aktına əsasən, Zahid Xəlilzadə 2025-ci il tarixdə saat 18 radələrində taksi fəaliyyəti ilə məşğul olduğu “Renault” markalı avtomobil ilə Sumqayıt şəhərindən sərnişin götürərək Bakı-Sumqayıt şose yolu ilə paytaxt ərazisi istiqamətində hərəkət edib. Avtomobil Abşeron rayonu, Xırdalan şəhərində Masazır dairəsi istiqamətində köməkçi yolla hərəkətdə olarkən qabaq oturacaqda əyləşmiş sərnişin, zərərçəkmiş Fərəc Babayev (adı, soyadı şərtidir) buna etiraz edib. Sürücünün kobud davranışı səbəbindən tərəflər arasında şəxsi münasibətlər zəminində mübahisə yaranıb. Bu zaman təqsirləndirilən şəxs avtomobili Masazır dairəsinə yaxın ərazidə saxlayaraq Fərəci nəqliyyat vasitəsindən düşürüb və ona fiziki zor tətbiq edib. Belə ki, Zahid zərərçəkmiş şəxsə yumruqla sifət nahiyəsindən, ayaqla isə müxtəlif nahiyələrindən zərbələr endirərək onu yerə yıxıb.
Hadisə nəticəsində zərərçəkmiş şəxsə burun nahiyəsinin və sağ əlin 5-ci barmağının sıyrıqları, sağ dirsək oynağı nahiyəsinin və sağ əlin qançırları, alt dodağın əzilmiş yarası, eləcə də xaya nahiyəsinin hematoması kimi xəsarətlər yetirilib. Məhkəmə-tibbi ekspertizasının rəyinə əsasən, həmin xəsarətlər sağlamlığın qısa müddətə pozulmasına səbəb olan və qəsdən sağlamlığa yüngül zərər vurma kimi qiymətləndirilib.
Beləliklə, təqsirləndirilən şəxs Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə nəzərdə tutulmuş cinayət əməlini törətməkdə ittiham olunub.
Məhkəmə iclasında Zahid Xəlilzadə elan olunmuş ittiham üzrə özünü təqsirli bildiyini bəyan edib.
Kamal Məmmədov
