BAKI, 16 fevral. TELEQRAF
İsrail hökuməti İordan çayının qərb sahilində torpaqların qeydiyyatı prosesinə başlanılmasını təsdiqləyib.
Teleqraf xəbər verir ki, İsrailin dövlət teleradio şirkəti "Kan"ın yaydığı məlumata görə, bu qərar 1967-ci ildən bəri ilk dəfə qəbul edilib. Həmin il Altıgünlük müharibənin nəticələrinə görə, əvvəllər İordaniyanın nəzarətində olan bu ərazi İsrailin nəzarətinə keçmişdi.
"Kan"ın qiymətləndirməsinə əsasən, bu addım İsraildə rəsmi olaraq “Yəhudiya və Samariya” adlandırılan regionun anneksiyası istiqamətində növbəti mərhələ kimi dəyərləndirilir. Beynəlxalq hüquqa görə isə bu ərazi işğal olunmuş hesab olunur.
Məlumata görə, qərar İordan çayının qərb sahilində torpaq mülkiyyəti ilə bağlı mübahisələrin tənzimlənməsinə yönəlib. Bu çərçivədə İsrailin Ədliyyə Nazirliyi yanında Torpaq Hüquqlarının Qeydiyyatı İdarəsinə əlavə maliyyə vəsaiti, səlahiyyətlər və kadrlar ayrılacaq ki, torpaq sahələrinin dövlət reyestrinə daxil edilməsi prosesi təşkil olunsun.
İsrail hakimiyyətinin bəyanatında bildirilir ki, bu addım məhkəmə çəkişmələrinə son qoyacaq, infrastrukturun inkişafına və torpağın daha nizamlı şəkildə satılmasına imkan yaradacaq. İsrail tərəfi həmçinin qeyd edir ki, bu qərar “Zona C” adlanan ərazilərdə Fələstin Administrasiyasının qanun və razılaşmaları pozaraq apardığı qeyri-qanuni məskunlaşma fəaliyyətinə adekvat cavabdır.
