BAKI, 15 fevral. TELEQRAF
ABŞ Maliyyə Nazirliyinin Terrorla Mübarizə və Maliyyə Kəşfiyyatı üzrə müavini Con Hörli, nazir Skott Bessentlə baş verən fikir ayrılığı səbəbindən vəzifəsini tərk etməyi planlaşdırır.
Teleqraf xəbər verir ki, bu barədə "Bloomberg" agentliyi məlumat yayıb.
Bildirilir ki, Hörli və Bessent arasındakı münaqişə ABŞ-nin sanksiya siyasətinin taktikası və məqsədləri ilə bağlı fikir ayrılıqlarından irəli gəlib. Mənbələr qeyd edir ki, Hörlinin səfir postuna namizədliyi nəzərdən keçirilir, bu da onun sadiq və dəyərli müttəfiq olaraq qalmasını təmin etmək məqsədi daşıyır.
"Bloomberg"in məlumatına görə, Hörlinin istefası ABŞ Maliyyə Nazirliyində rəhbər heyətin kütləvi istefalarının davamı olacaq. Belə ki, 2025-ci ilin avqustunda nazir müavini Maykl Folkender, payızda isə Bessentin aparat rəhbəri Dan Kats və onun ardınca Maykl Fridman vəzifələrini tərk etmişdilər.
