"Budur, Trampın Rusiya diktatorunu ayıltmaq planlarının nümayişi..."
Cənubi Qafqaz regionunda Ukrayna mediasının lazımi diqqət ayırmadığı mühüm proseslər gedir.
Moderator.az xəbər verir ki, bu barədə "Ukrayna Azərbaycanlılarının Birləşmiş Diasporu" İctimai Təşkilatının sədri Hikmət Cavadov "gordonua.com" nəşrində yazıb.
ABŞ Cənubi Qafqazda mövqelərini gücləndirir
ABŞ-ın vitse-prezidenti Cey Di Vensin Ermənistan və Azərbaycana səfərləri Vaşinqtonun Rusiyanın uzun illər "müstəsna təsir zonası" saydığı bölgədə təsir imkanlarını genişləndirmək niyyətini açıq şəkildə ortaya qoyur.
Vensin İrəvana səfəri çərçivəsində ABŞ və Ermənistan arasında 9 milyard dollarlıq nüvə energetikası əməkdaşlığı barədə razılaşma əldə olunub. Layihə kiçik modul reaktor texnologiyalarının Ermənistana verilməsini nəzərdə tutur.
Bununla yanaşı, ABŞ "Tramp marşrutu" layihəsi çərçivəsində Ermənistan infrastrukturuna sərmayə yatıracaq. "Nvidia" çiplərinin satışına lisenziyalar təsdiqlənib, ölkədə güclü süni intellekt mərkəzinin yaradılması planlaşdırılır. Vaşinqton eyni zamanda Ermənistana 11 milyon dollar dəyərində V-BAT tipli kəşfiyyat PUA-ları satacaq.
Bu proseslər Ermənistanın hələ də Rusiya hərbi bazasına ev sahibliyi etməsi, formal olaraq KTMT və Avrasiya İqtisadi İttifaqının üzvü qalması fonunda baş verir. Energetika və qaz təchizatı sahəsində də Rusiyadan asılılıq davam edir. Lakin buna baxmayaraq, İrəvan "Tramp yolu" layihəsinə Rusiyanın müdaxilə cəhdlərini rədd edib.
Bakı-Vaşinqton xəttində strateji dönüş
Vensin Bakıya səfəri zamanı Azərbaycanla ABŞ arasında Strateji Tərəfdaşlıq Xartiyası imzalanıb. Sənəd müdafiə və hərbi-texniki əməkdaşlığın genişləndirilməsini, müdafiə məhsullarının tədarükünü nəzərdə tutur.
Xartiyada terrorizmlə mübarizə, transmilli təhdidlərə qarşı birgə fəaliyyət, kibertəhlükəsizlik və kritik infrastrukturun qorunması xüsusi yer tutur. Eyni zamanda kosmik sahədə əməkdaşlıq, məlumat emalı mərkəzlərinin yaradılması və süni intellekt texnologiyalarının inkişafı planlaşdırılır.
Beləliklə, Bakı ilə Vaşinqton arasında tərəfdaşlıq artıq yalnız enerji gündəmi ilə məhdudlaşmır və uzunmüddətli təhlükəsizlik arxitekturasının qurulmasına yönəlir. Şərqlə Qərbin kəsişməsində yerləşən Azərbaycan Avropa, Avrasiya və Hind-Sakit okean iqtisadi sistemlərini birləşdirən strateji körpüyə çevrilir.
Rusiyanın təsir imkanları zəifləyir
İrəvan və Bakı ilə imzalanan sənədlər fonunda Rusiya Cənubi Qafqazdakı əvvəlki təsir imkanlarını sürətlə itirir. Gürcüstanda hakimiyyətdə olan rusiyayönümlü qüvvələr belə regiondakı güc balansının ABŞ-ın xeyrinə dəyişməsi şəraitində mövqelərini korrektə etməyə məcbur qala bilər.
Rusiya eyni zamanda Mərkəzi Asiyada da əvvəlki mövqelərini zəiflədir. Bu ölkələr ABŞ-la əməkdaşlığı gücləndirməyə çalışırlar. "Kiyevi üç günə almaq" planı ilə müharibəyə başlayan Vladimir Putin nəticədə Rusiyanın Cənubi Qafqaz və Mərkəzi Asiyada təsirini daha da sarsıdıb.
Trampın strategiyası və Ukraynanın rolu
Bu proseslər ABŞ prezidenti Donald Trampın Rusiya rəhbərliyinə qarşı strateji təzyiq xəttinin tərkib hissəsi kimi qiymətləndirilə bilər. Rusiya getdikcə daha çox təcrid olunur və bu, iqtisadi problemlərlə birlikdə Moskvanı Ukraynaya qarşı müharibə planlarını dəyişməyə məcbur edə bilər.
Bütün bunlar isə ilk növbədə Ukraynanın Kremlin ölkəni tam işğal etmək planlarına qarşı göstərdiyi qəhrəmancasına müqavimətin nəticəsidir. Məhz həmin planların iflası Cənubi Qafqaz və Mərkəzi Asiyada bu gün müşahidə olunan geosiyasi dəyişiklikləri mümkün edib.
