Rusiya xarici işlər nazirinin müavini Mixail Qaluzin bildirib ki, Ermənistan Qərbin Rusiya ilə geosiyasi qarşıdurmasında alətə çevrilir.
Bizim.Media xəbər verir ki, bu barədə o, TASS-a müsahibəsində danışıb.
Qaluzin xatırladıb ki, Ermənistanın baş naziri Nikol Paşinyan ölkəsinin kursunun Rusiyanın maraqlarına zərər vurmağı nəzərdə tutmadığını bəyan edib.
“Buna baxmayaraq, görürük ki, İrəvan Qərb ölkələri və birlikləri ilə hərbi-siyasi və iqtisadi yaxınlaşmanın tempini artırır. Ermənistandakı tərəfdaşlarımıza dəfələrlə demişik ki, Qərb Ermənistanın Moskva ilə qarşıdurmada geosiyasi mübarizə aləti olduğunu artıq gizlətmir”, — deyə diplomat qeyd edib.
Fevralın 10-da Paşinyan bildirib ki, İrəvan Moskvaya qarşı addımlar atmayacaq.
2024-cü ilin fevralında Ermənistan Kollektiv Təhlükəsizlik Müqaviləsi Təşkilatının (KTMT) fəaliyyətində üzvlüyünü dondurub. Ölkə həmçinin blokun maliyyələşdirilməsindən imtina edib. İrəvan bu qərarını təşkilatın Qarabağdakı vəziyyətə lazımi reaksiya verməməsi və Ermənistanın müdafiəsinə laqeyd qalması ilə əsaslandırıb.
Ermənistanın baş naziri Nikol Paşinyan izah edib ki, KTMT-də üzvlüyün dondurulması beynəlxalq silah bazarlarına çıxış əldə etmək üçün zəruri idi. Onun sözlərinə görə, 2022-ci ildə Ermənistanın yüz milyonlarla dollar dəyərində silah tədarükü müqavilələri mövcud olsa da, onlar icra olunmurdu.
Bizim.Media
