ain.az bildirir, Banco.az saytına əsaslanaraq.
Müəllif:Mehin Qasımova,Banco.az
Sürətlə böyüyən Çin avtomobil istehsalçısı "BYD" 2025-ci ildə tarixinin ən yüksək illik satış göstəricisinə nail olub.
Banco.az xəbər verir ki, şirkət 120 illik Amerika avtomobil nəhəngi "Ford"u geridə qoyaraq dünyanın altıncı ən böyük avtomobil istehsalçısına çevrilib.
Məlumata görə, "BYD" ötən il qlobal miqyasda 4,6 milyon avtomobil satıb. Bu, əvvəlki illə müqayisədə 7,7% artım deməkdir. "Ford"un satışları isə 2% azalaraq 4,4 milyon ədədə düşüb.
Bu fonda "BYD" ilə yanaşı "Xiaomi" və "Geely" kimi yerli istehsalçılar əlverişli qiymətə və texnologiyaya fokuslanan elektrikli nəqliyyat vasitələri ilə bazar paylarını artırıblar. Elektrik nəqliyyatına keçid prosesində çətinliklər yaşayan "Ford" ümumilikdə 19,5 milyard dollar zərər açıqlayıb.
"BYD" üçün ən böyük bazar hələ də Çin olaraq qalır. Bununla yanaşı, şirkət Avropa, Cənubi Amerika və Asiya bazarlarına aktiv şəkildə genişlənərək ixracını sürətlə artırıb. 2025-ci ildə BYD-nin ixracı 1,05 milyon nəqliyyat vasitəsinə çatıb və bu göstəricinin 2026-cı ildə 1,3 milyona yüksələcəyi proqnozlaşdırılır.
Beynəlxalq bazarlardakı artım "BYD" üçün xüsusilə önəmlidir. Çünki Çində elektrik və qoşulan hibrid avtomobillərə tələbatda yavaşlama müşahidə olunur.
Qeyd edək ki, "Toyota" (Lexus, Hino və Daihatsu brendləri daxil olmaqla) ümumi satışlarını 11,32 milyon ədədə çatdıraraq ardıcıl altıncı dəfə dünyanın ən böyük avtomobil istehsalçısı adını qoruyub.
"Volkswagen" satışlarda 0,5% azalma olsa da, 8,98 milyon avtomobillə ikinci yerdə qərarlaşıb.
"Hyundai Motor Group" 7,28 milyon ədəd satışla üçüncü olub. Ardınca "General Motors" dördüncü, "Stellantis" isə beşinci yeri tutub.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
