Sakinlərin sözlərinə görə, sonradan qəbiristanlıq ərazisində cəmi 2–3 quyu qazılıb, lakin işlər yarımçıq saxlanılıb. Kənddaxili yolların təmirinə başlanılsa da, yarımçıq qalıb. Yarımçıq yol işlərindən qalan çınqılı isə kommunal xidmət maşınları vasitəsilə kənd yollarına səpilib. İddialara əsasən, ayrılmış vəsait kənd sakinlərinin problemlərinin həllinə sərf olunmayıb. Bələdiyyə sədri hazırda büdcədə vəsait olmadığını bildirir. Sakinlər isə qeyd edirlər ki, əvvəlki dövrlərdə də mövcud vəsait kəndin ehtiyaclarına yönəldilməyib.
Məlumata görə, rayon bələdiyyəsi bir neçə kəndə nəzarət edir. Qonşu kəndlərdə yolların təmir olunduğu bildirilir. Balaca Həmyə kəndinin sakinləri isə hər gün çətinliklərlə üzləşdiklərini, nəqliyyat vasitələrinin tez-tez sıradan çıxdığını, məktəblilərin isə dərsə gedib-gəlməkdə əziyyət çəkdiklərini deyirlər.
