Şimal yarımkürəsində qışın sərt şaxtaları hökm sürdüyü bir vaxtda Cənub yarımkürəsi həddindən artıq isti, quraqlıq və şiddətli küləklərin tətiklədiyi dağıdıcı yanğınlarla mübarizə aparır.
Şimal yarımkürəsinin böyük hissəsi dondurucu soyuqların təsiri altındadır. Xüsusilə Sibir, Şimali Kanada və Qrenlandiya kimi bölgələrdə temperatur mənfi 50 dərəcədən aşağı düşərək rekord səviyyələrə çatıb. Kanada, ABŞ, Rusiya və Yaponiya kimi ölkələrdə rekord miqdarda qar yağışı və şiddətli qış şəraiti gündəlik həyata mənfi təsir göstərir.
Cənubda isə Avstraliya yanğınların dağıdıcı üzü ilə ən çox qarşılaşan ölkədir. Argentina, Çili və Cənubi Afrikada da yanğınlar öz təsirini göstərməkdədir.
Avstraliya: Yüz minlərlə hektar ərazi külə dönüb
Hər il yanğınların geniş ərazilərə yayıldığı Avstraliyada bu il Viktoriya, Cənubi Avstraliya və Qərbi Avstraliya ştatları alovlarla mübarizə aparır.
Viktoriya ştatı: Yanvarın əvvəlində 40-50 dərəcəyə çatan temperatur və şiddətli küləklər böyük yanğınlara yol açıb. 400 min hektardan çox meşə sahəsi yanıb, 900-dən çox tikili zərər görüb.Cənubi Avstraliya: Fleryö yarımadasındakı "Deep Creek" Milli Parkında 4500 hektar ərazi yanıb.Qərbi Avstraliya: Pert şəhəri yaxınlığındakı yaşayış məntəqələri üçün fövqəladə vəziyyət xəbərdarlığı edilib.
Çili və Argentina: Patagoniya alovlar içində
Argentina və Çilinin Patagoniya bölgəsində yanvar ayında başlayan meşə yanğınları hələ də tam nəzarətə alına bilməyib.
Çili: Biobio və Nuble bölgələrindəki yanğınlarda 23 nəfər həyatını itirib, on minlərlə insan təxliyə edilib.Argentina: İldırım düşməsi nəticəsində başlayan yanğınlar Çubut əyalətində davam edir. 45 min hektar ərazi külə dönüb. Yanğınlar UNESCO-nun Ümumdünya İrsi siyahısına daxil olan "Los Alerces" Milli Parkına ciddi zərər vurub.
Cənubi Afrika: Son 10 ilin ən ağır mövsümü
Cənubi Afrika Respublikası 2026-cı il etibarilə son onilliyin ən dağıdıcı yanğın mövsümlərindən birini yaşayır. Xüsusilə Qərbi Keyp və Şərqi Keyp əyalətlərində geniş ərazilər zərər görüb. Qərbi Keypdə kül olan sahə 132 min hektarı keçib.
Keyptaunun Dunun bölgəsindəki yanğında təxminən 5 min nəfər evsiz qalıb. Üzüm bağları və meyvə bağları başda olmaqla kənd təsərrüfatı sahələrinə ciddi ziyan dəyib. Ekspertlər bu qeyri-adi hava şəraitini həddindən artıq istilər, uzun sürən quraqlıq və şiddətli küləklərlə əlaqələndirirlər.
