Polşa Prezidenti Karol Navrotski Rusiya lideri Vladimir Putinlə danışıqlar masasına oturmağa hazır olub-olmadığı sualına cavab verib.
Bu barədə Polskie Radio Ukrayna məlumat verir.
Navrotski qeyd edib ki, bu sual ona seçki kampaniyası zamanı da verilib: “Mən şəxsən Vladimir Putin və Rusiya Federasiyası tərəfindən təqib olunuram, ona görə də cinayətkar Putin və Lukaşenko rejiminin nümayəndəsi ilə masaya oturmağa tələsmirəm”, – deyə Polşa Prezidenti bildirib.
Eyni zamanda, o, əlavə edib ki, əgər Polşa dövlətinin maraqları tələb edərsə, Polşa Prezidenti kimi bunu etməyə hazırdır. “Mən cavab verdim ki, əgər Polşa Respublikasının maraqları tələb edərsə, istənilən şəxslə masaya oturacağam”, – deyə o bildirib. Navrotski Rusiyanın Birləşmiş Millətlər Təşkilatının idarəetmə orqanının üzvü olduğunu qeyd edib və ritorik şəkildə bunun Polşanın təşkilatdan çıxmasına səbəb olub-olmadığını soruşub: “Xatırlatmaq istəyirəm ki, Rusiya da Birləşmiş Millətlər Təşkilatının idarəetmə orqanının üzvüdür. Bu o deməkdirmi ki, biz Birləşmiş Millətlər Təşkilatından çıxmalıyıq?”
//Samir Qurbanov, Editor.az
