ABŞ qoşunları Suriyanın şərqindəki Əl-Tənf hərbi bazasını tamamilə tərk edərək İordaniyaya köçürülüb. Oxuməni.az xəbər verir ki, bu barədə “AFP”-yə Suriya hərbi strukturlarından iki mənbə məlumat verib.
Məlumata görə, "bu gün ABŞ qoşunları Əl-Tənf bazasını tamamilə tərk edib".
İkinci mənbənin sözlərinə görə, texnika və personalın çıxarılması son 15 gün ərzində davam edib. O, qeyd edib ki, ABŞ hərbçiləri "İordaniyadan (Əl-Tənfdəki personal ilə) əlaqələndirməyə davam edəcəklər".
Daha sonra Suriya Müdafiə Nazirliyi Suriya və ABŞ hakimiyyətləri arasında əməliyyatların razılaşdırılmasından sonra Suriya ordusunun bölmələrinin azad edilmiş bazaya nəzarəti ələ keçirdiyini bildirib.
Əl-Tənf bazası Suriya, İordaniya və İraq sərhədlərinin kəsişməsində strateji ərazidə yerləşir. O, 2014-cü ildə "İslam Dövləti" terror qruplaşmasına qarşı beynəlxalq koalisiyanın əməliyyatları üçün əsas mərkəz kimi yaradılıb.
Mənbələrin məlumatına görə, Əl-Tənfi tərk edən bölmələr, ehtimal ki, İordaniyada mövcud ABŞ obyektlərində yerləşdiriləcək.
Almaz Həsənli
