Bloomberg-in iddiasına görə, Türkiyə prezidenti oğlunu gələcək lider kimi formalaşdırır...
Poliqon xəbər verir ki, Bloomberg Agentliyinin yaydığı məlumata əsasən, Türkiyə prezidenti Rəcəb Tayyib Ərdoğan 44 yaşlı oğlu Bilal Ərdoğanı potensial siyasi varisi kimi hazırlayır. Son dövrlər Bilal Ərdoğanın həm daxili, həm də beynəlxalq səviyyədə fəallığının artması diqqət çəkir.
Agentliyin yazdığına görə, Bilal Ərdoğan prezidentin xarici səfərlərində onu mütəmadi müşayiət edir, dövlət idarəçiliyində kadr seçimləri prosesində qeyri-rəsmi rol oynayır və hakim Ədalət və İnkişaf Partiyası (AKP) daxilində ona sadiq şəxslərdən ibarət şəbəkə formalaşdırır. Bu proses onun tədricən siyasi sistemə inteqrasiyasından xəbər verir.
Bilal Ərdoğan açıq şəkildə prezidentlik və ya yüksək siyasi postlara iddiası olmadığını bildirsə də, Bloomberg-ə danışan siyasi analitiklər və mənbələr hesab edirlər ki, o, faktiki olaraq qeyri-rəsmi liderlik təlimi keçir. Ekspertlərin fikrincə, bu təcrübə gələcəkdə onun AKP-nin sədri və ya Türkiyənin vitse-prezidenti postuna gətirilməsi üçün zəmin yarada bilər.
Qeyd olunur ki, Türkiyədə rəsmi olaraq siyasi varislik mexanizmi mövcud olmasa da, Ərdoğanın uzun illər ərzində qurduğu güclü siyasi sistemdə ailə üzvlərinin və yaxın çevrənin rolu getdikcə artır. Bilal Ərdoğanın dövlət və ictimai tədbirlərdə daha görünən fiqura çevrilməsi də bu ehtimalları gücləndirir.
Bloomberg yazır ki, Ərdoğan hakimiyyətinin gələcək taleyi və AKP-nin uzunmüddətli strategiyası kontekstində Bilal Ərdoğanın rolu həm Türkiyə daxilində, həm də beynəlxalq müşahidəçilər arasında ciddi maraq doğurur.
Poliqon.info
