ain.az, Sia Az saytına istinadən bildirir.
Qənaət kasıblıq deyil, ağılın səssiz zənginliyidir
Cəmiyyətin çox vaxt səhv başa düşdüyü bir anlayış var: qənaət. Onu bəzən kasıblıqla, çatışmazlıqla, imkansızlıqla eyniləşdirirlər. Halbuki qənaət ehtiyacdan doğan məcburiyyət yox, düşüncədən doğan seçimdir. Qənaət edən insan az olanla yaşamağa məhkum deyil, o, sahib olduqlarının dəyərini bilən insandır.
Qənaət səs-küylü dəbdəbədən imtina edib, sakit rahatlığı seçməkdir. Hər xərci nümayiş etdirməmək, hər arzuya dərhal təslim olmamaqdır. Qənaət “mən bacarmıram” demək deyil, “mən bilirəm” deməkdir. Harada xərcləmək lazımdır, harada dayanmaq gərəkdir, bunu bilmək ağlın zənginliyidir.
Əsl zənginlik bank hesabındakı rəqəmlərlə ölçülmür. Əsl zənginlik sabaha qorxusuz baxmaqdır. Gözlənilməz günlərə hazır olmaqdır. Qənaət edən insan ehtiyatlıdır, amma qorxaq deyil; ölçülüdür, amma xəsis deyil. O, pulun qulu yox, sahibidir.
Bu gün cəmiyyət bizi daha çox xərcləməyə, daha çox göstərməyə, daha çox sübut etməyə vadar edir. Bahalı geyimlə dəyərimizi, dəbdəbəli həyatla uğurumuzu ölçmək istəyir. Amma qənaət bizə pıçıldayır: “Sakit ol. Hər şey görünməli deyil.” Bəzən ən böyük güc səssizlikdə, ən böyük zənginlik sadəlikdə gizlənir.
Qənaət həm də hörmətdir, zəhmətə hörmət, qazanılan pula hörmət, gələcək özünə hörmət. Hər qənaət edilən qəpik sabaha atılan kiçik, amma möhkəm bir addımdır. Bugünkü ağıllı seçimlər sabahkı rahat həyatın təməlidir.
Unutmayaq: israf zənginlik gətirmir, qənaət kasıblıq yaratmır. Qənaət düşünən beynin, ölçən vicdanın, planlayan ağlın səssiz zənginliyidir. Və bu zənginlik heç vaxt dəyərdən düşmür.
Qənaət insanı sıxmır, əksinə azad edir. Lazımsız xərclərin yaratdığı stressdən, borc qorxusundan, sabahın qeyri-müəyyənliyindən xilas edir. İnsan nə qədər az israf edirsə, bir o qədər rahat nəfəs alır. Çünki qənaət təkcə pul saxlamaq deyil, daxili tarazlığı qorumaqdır. Sakit bir vicdan, rahat bir yuxu da qənaətin görünməyən qazancıdır.
Qənaət həm də tərbiyədir- ailədən, mühitdən, həyatın özündən öyrənilən dəyər. Uşaqlara miras qoyulan ən böyük sərvət də budur: pulu qazanmağı deyil, onu düzgün idarə etməyi öyrətmək. Çünki pul gedə bilər, imkanlar dəyişə bilər, amma ağıllı yanaşma insanı heç vaxt yarı yolda qoymaz. Qənaət vərdişi olan insan hər dövrdə ayaqda qalmağı bacarır.
Bəzən insan susaraq qazanar. Nə bahalı həyatını danışar, nə xərclərini nümayiş etdirər. Amma səssizcə böyüyər, güclənər, möhkəmlənər. Qənaət də elə budur, səssiz inkişaf. Hay-küysüz, nümayişsiz, amma sağlam təməl üzərində qurulan bir zənginlik. Və bu zənginlik bir gün öz sözünü deyir.
Ən son xəbərləri və yenilikləri almaq üçün ain.az saytını izləyin.
