Sifariş FTB-nin azyaşlıların cinsi istismarı üzrə istintaqına start verilməsindən az sonra edilib...
Ceffri Epşteyn 2018-ci ildə ona məxsus şəxsi adaya sənaye təyinatlı kükürd turşusunun iri həcmli partiyasını sifariş edib.
Poliqon xəbər verir ki, bu fakt Epşteyn işi üzrə açıqlanan materiallarda yer alıb və International Business Times nəşri tərəfindən ABŞ Ədliyyə Nazirliyinin sənədlərinə istinadən yayımlanıb.
Sənədlərə əsasən, Epşteyn altı ədəd 55 qallonluq (təxminən 208 litrlik) çəlləkdə sənaye keyfiyyətli kükürd turşusu alıb. Ümumi həcm təqribən 1 249 litr təşkil edib. Kimyəvi maddələrin alınması və şəxsi adaya çatdırılması üçün ümumilikdə 4 min ABŞ dollarından artıq vəsait ödənilib.
Nəşr qeyd edir ki, bu sifariş Federal Təhqiqat Bürosunun (FTB) Epşteyn barəsində azyaşlıların cinsi məqsədlərlə alveri və istismarı ilə bağlı istintaqa başladığı dövrdən qısa müddət sonra verilib. Məhz bu zamanlama sifarişin mahiyyəti ilə bağlı ictimai marağı və şübhələri daha da artırıb.
Məsələ ilə bağlı sosial şəbəkələrdə müxtəlif ehtimallar irəli sürülüb. İstifadəçilər arasında kükürd turşusunun mümkün cinayət izlərini, o cümlədən meyitləri məhv etmək üçün istifadə oluna biləcəyi barədə fərziyyələr səsləndirilib. Lakin hüquq-mühafizə orqanları və rəsmi sənədlər bu versiyanı təsdiqləyən heç bir sübutun olmadığını vurğulayır.
International Business Times yazır ki, hazırda bu alışın konkret hansı məqsədlə həyata keçirildiyi barədə rəsmi açıqlama mövcud deyil. ABŞ-nin hüquq-mühafizə strukturları Epşteynin maliyyə və logistik fəaliyyətləri ilə bağlı materialları araşdırmağa davam edir və yeni faktların üzə çıxması istisna edilmir.
Poliqon.info
