Rusiyanın Ukraynaya qarşı artıq dörd ildir davam edən müharibəsi Avropa və NATO təhlükəsizliyi üçün ən böyük təhdid olaraq qalır.
Turkustan.az xəbər verir ki, transatlantik münasibətlərdəki gərginliyin isə Kiyevə göstərilən dəstəyə mənfi təsir etdiyi bildirilir.
Turkustan.az xəbər verir ki, bu qənaət bazar ertəsi günü Berlində səfir Volfqanq İşinqer tərəfindən təqdim olunan builki Münhen Təhlükəsizlik Konfransının (MSC) hesabatında yer alıb.
Hesabatın müəllifləri sənədi “Çöküş altında” adlandırıblar. İşinqerin sözlərinə görə, hesabat təhlükəsizliyin hazırkı vəziyyətini və uzun müddət sabit sayılan “beynəlxalq nizam evinin” sarsıldığını, hətta dağılma riski ilə üz-üzə qaldığını əks etdirməyi hədəfləyir.
Sənəddə vurğulanır ki, Rusiyanın Ukraynaya qarşı təcavüzü NATO üzvləri və Avropa təhlükəsizliyi üçün “ən əhəmiyyətli və birbaşa təhlükə”dir.
Hesabatda qeyd olunur ki, müharibə “vəhşilik və zorakılığın yeni zirvələrinə” çatıb. Döyüş meydanındakı ağır itkilərə, sərt sanksiyalara, Ukraynanın Rusiya infrastrukturuna hücumlarının artmasına və danışıqlara çağıran beynəlxalq təzyiqlərə baxmayaraq, Kreml maksimalist məqsədlərindən geri çəkildiyini göstərmir.
Müəlliflərin bildirdiyinə görə, Rusiyanın 2025-ci il üçün federal büdcəsinin təxminən 40 faizi, yəni ÜDM-nin 8 faizi təhlükəsizlik və müdafiə xərclərinə ayrılıb. Hesabatda həmçinin qeyd olunur ki, Rusiyanın mütəmadi olaraq nüvə silahlarından istifadə ehtimalını gündəmə gətirməsi hərbi təhdidin Ukrayna ilə məhdudlaşmadığını açıq şəkildə göstərir.
Aytən Yaşar/ Turkustan.az
