ABŞ-nin Londondakı səfirliyi artıq okeanın o tayına səfər edərkən kiçik cinayətlərə görə məhkum edilmiş biznes rəhbərlərinə və top menecerlərə viza vermir.
Hafta.az "Financial Times"a istinadən xəbər verir ki, bu qərar 1970-ci illərdən başlayaraq bar davaları, sərxoş vəziyyətdə maşın sürmə və marixuana istifadəsi kimi qanun pozuntuları olan şəxslərə şamil edilir.
Vəkillərin sözlərinə görə, vizaları rədd edilənlər arasında texnologiya şirkətlərinin yüksək vəzifəli rəhbərləri də var.
Bəzi müraciət edənlər əvvəlcədən vizalarının təsdiqlənəcəyini öyrənsələr də, sonradan onlara viza verilməyib. Məlumatda bildirilir ki, bu yanaşma ABŞ Dövlət katibi Marko Rubionun "tut və ləğv et" siyasətindən sonra daha geniş tətbiq olunur.
Qeyd olunur ki, Britaniya vətəndaşları 90 günə qədər ESTA (Electronic System for Travel Authorization) ilə ABŞ-də qala bilərlər, lakin əvvəllər cinayət törətmiş şəxslər vizaya müraciət etməlidirlər.
