Azertag saytından verilən məlumata görə, ain.az xəbər verir.
Bakı, 9 fevral, AZƏRTAC
Milli Azərbaycan Tarixi Muzeyinin Etnoqrafiya fondunda qorunan maraqlı məişət nümunələrindən biri Qazax bölgəsinə aid xurcundur.
Muzeydən AZƏRTAC-a bildirilib ki, bu toxuculuq məmulatı XX əsrin əvvəllərində yun ipdən hazırlanıb və dövrün gündəlik həyat tərzini əks etdirən əhəmiyyətli etnoqrafik material hesab olunur.
Xurcun iki gözlü formada toxunub və əsasən ev təsərrüfatında müxtəlif əşyaların daşınması məqsədilə istifadə edilib. Nümunənin üzərində yer alan həndəsi naxışlar və rənglərin canlı uyğunluğu bölgəyə xas bədii zövqü nümayiş etdirir. Qotazlı bağlar isə məmulatın həm istifadəsini asanlaşdırıb, həm də estetik görünüşünü tamamlayıb.
Mütəxəssislərin fikrincə, bu tip xurcunlar təkcə praktik əşya olmayıb, eyni zamanda, xalqın dünyagörüşünü, simvolik düşüncəsini və ənənəvi sənətkarlıq bacarığını özündə birləşdirib. Hazırda muzeydə mühafizə olunan bu nümunə Azərbaycanın toxuculuq irsinin öyrənilməsi baxımından dəyərli mənbə kimi qiymətləndirilir.
Ən son xəbərləri və yenilikləri almaq üçün ain.az saytını izləyin.
