Bakının Nərimanov rayonunda baş verən kütləvi dava ictimai diqqət mərkəzinə düşüb. Hadisənin mərkəzində türkiyəli iş adamı, “Okuklu Holding”in rəhbəri Yılmaz Okuklu yer alıb. Onun iddiasına görə, fevralın 8-də bir qrup şəxs tərəfindən hücuma məruz qalıb.
Məlumata görə, insident Nərimanov rayonunda yerləşən tikinti şirkətlərindən birinin ərazisində baş verib. Hadisə zamanı Yılmaz Okuklu sosial şəbəkədə canlı yayım açaraq bir neçə nəfərin ona hücum etdiyini bildirib. İlkin məlumatlara əsasən, dava işgüzar mübahisə zəminində yaranıb.
Daxili İşlər Nazirliyinin mətbuat xidməti faktı təsdiqləyərək bildirib ki, fevralın 8-i səhər saatlarında polis Nərimanov rayonunda tikinti şirkətinin nümayəndələri ilə bir neçə sakin arasında baş verən insident barədə məlumat alıb. Polis əməkdaşları hadisə yerinə cəlb olunaraq qarşıdurmanın qarşısını alıblar. Hazırda faktla bağlı araşdırma aparılır.
Hadisə fonunda Yılmaz Okuklunun adı daha əvvəl həbs edilmiş iş adamı Ruslan Eyyubovla əlaqələndirilir. Məlumata görə, Okuklu həbsdə olan general Bəylər Eyyubovun qardaşı oğlu Ruslan Eyyubovun biznes ortaqlarından biridir.
Ruslan Eyyubovun rəhbərlik etdiyi NB Holding şirkətlər qrupunun 1 fevral 2025-ci il tarixli mətbuat açıqlamasında Yılmaz Okuklu ilə işgüzar əlaqələrdən bəhs edilib. Açıqlamada NB Holding-in müşahidə şurasının sədrinin Bakıda yeni Türk Ticarət Mərkəzinin sahibi və Okuklu Holding-in direktorlar şurasının rəhbəri Yılmaz Okuklu ilə görüş keçirdiyi qeyd olunub. Görüşdə iki holdinq arasında əməkdaşlıq perspektivlərinin müzakirə edildiyi və bir sıra mühüm qərarların qəbul edildiyi bildirilib.
Sözügedən layihələrə Azərbaycanda mineral yataqların işlənməsi və yeni istehsal müəssisələrinin yaradılması, Türkiyə investisiyalarının cəlb edilməsi, türk dövlətləri arasında logistika xidmətlərinin genişləndirilməsi, eləcə də Qırğızıstanda İssık-Kul gölü sahilində yeni paytaxtın tikintisində iştirak kimi planlar daxildir.
Yılmaz Okuklu Türkiyənin İğdır vilayətində anadan olub. O, 2000-ci illərin ortalarından etibarən Azərbaycanda biznes fəaliyyəti ilə məşğuldur. Okuklunun Bakı Dövlət Universitetinin məzunu olduğu bildirilir. Vergi məlumatlarına əsasən, o, 2020-ci ildə Azərbaycanda 2 milyon manat nizamnamə kapitalı ilə “HA 20” MMC-ni təsis edib. Şirkət Bakı şəhəri, Nərimanov rayonu, Ziya Bünyadov küçəsi 77Q ünvanında qeydiyyatdadır.
2024-cü ilin dekabrında Bakının Nərimanov rayonunda yerləşən Yılmaz Okuklu Türk Alış-veriş Mərkəzi istifadəyə verilib. Açılış mərasimində Türkiyənin Azərbaycan, Özbəkistan, Qazaxıstan və Qırğızıstandakı səfirləri, eləcə də yerli və türk iş adamları iştirak ediblər. Sahəsi 10 min kvadratmetr olan mərkəz çoxfunksiyalı ticarət kompleksi kimi fəaliyyət göstərir.
Qeyd edək ki, ötən il dekabrın 23-də Azərbaycan hüquq-mühafizə orqanları iri tütün qaçaqmalçılığı işi üzrə bir sıra yüksək vəzifəli şəxsləri, o cümlədən Ruslan Eyyubovu saxlayıb. Baş Prokurorluğun məlumatına görə, istintaq 5,4 milyon manatdan artıq dəyəri olan aksizsiz siqaret və tütün məmulatlarının qanunsuz dövriyyəsini əhatə edib.
“Bakı Beynəlxalq Dəniz Ticarət Limanı Hövsan” ASC-nin faktiki rəhbəri hesab edilən Ruslan Eyyubov mütəşəkkil qaçaqmalçılıq, aksiz markasız malların saxlanması və satışı, habelə vəzifə səlahiyyətlərindən sui-istifadə ittihamları ilə həbs edilib. İstintaq çərçivəsində limanın rəhbər heyətində və gömrük orqanlarında çalışan bir sıra şəxslər də məsuliyyətə cəlb olunub.
Bu hadisələrdən sonra Ruslan Eyyubovun qardaşı, Dövlət Gömrük Komitəsinin Dəniz Nəqliyyatı və Enerji Resursları Baş Gömrük İdarəsinin rəisi vəzifəsində çalışmış general-mayor Həsən Eyyubov vəzifəsindən azad edilib. Onlar Prezidentin Təhlükəsizlik Xidmətinin keçmiş rəisi, hazırda Prezident Katibliyinin rəhbəri olan general-polkovnik Bəylər Eyyubovun qardaşı oğullarıdır.
Hadisə ilə bağlı araşdırmalar davam edir.haqqin.az
