BU ayaqqabıların AYAĞA VURDUĞU ZƏDƏNİ HESABLAMISINIZMI?

Dikdaban ayaqqabılar görünüşə zəriflik qatsa da, günün sonunda yaranan ağrı və şişkinlik bütün rahatlığı əlindən ala bilir. Əslində isə bu narahatlıqdan bir neçə sadə vərdişlə qurtulmaq mümkündür.

Demorkat.az xəbər verir ki, gərgin gün və ya gecədən sonra ayaqların istirahətə ehtiyacı olur. Əgər şişkinlik, göyərmə və ya su toplaması yaranıbsa, bir neçə gün altı düz və rahat ayaqqabılara üstünlük vermək faydalıdır. Hətta imkan varsa, evdə ayaqyalın gəzmək sağalmanı sürətləndirir və ağrının dərinləşməsinin qarşısını alır.

İlıq su ilə ayaq vannası da rahatladıcı təsir göstərir. Ayaqları təxminən 20 dəqiqə suda saxlamaq əzələləri boşaldır, gərginliyi azaldır. İlk anda bir az narahatlıq yaransa belə, bu üsul dabanlı ayaqqabıdan sonra yaranan sərtlik hissini xeyli yüngülləşdirir.

Sadə dartınma hərəkətləri də ağrını azaltmağa kömək edir. Ayaq biləklərini dairəvi şəkildə hərəkət etdirmək, ayağı tennis topunun üzərində yuvarlamaq və barmaqları irəli-geri dartmaq qan dövranını yaxşılaşdırır. Dabanlı ayaqqabılar baldır əzələləri və Axilles vətərini qısalda bildiyi üçün bu nahiyələri boşaltmaq xüsusilə önəmlidir.

Əgər şişkinlik artıq iltihab həddinə çatıbsa, qısa müddətli buz tətbiqi fayda verə bilər. Buz kompressi və ya buzlu su ödemi azaldır və ağrını yüngülləşdirir.

Ayaqqabı seçərkən əsas məsələ düzgün ölçüdür. Gün ərzində ayaqlar şişdiyi üçün səhər uyğun görünən ayaqqabı axşama doğru sıxa bilər. Məhz buna görə yeni ayaqqabı alışını günün ikinci yarısına saxlamaq daha doğru seçim sayılır. Bu zaman ayaq real ölçüsünə ən yaxın vəziyyətdə olur.

Yaxşı yastıqlaması olan ayaqqabılar topuq nahiyəsindəki təzyiqi azaldır. Dəstəkləyici altlıqlar və ya xüsusi topuq içlikləri uzun müddət ayaqda qalmağı daha dözümlü edir.

Dabanlı ayaqqabıya öyrəşməyənlər üçün hündür stilettolar ayaqlar üçün yük yaradır. Əvvəlcə qısa və ya orta hündürlüklü dabanlarla başlamaq, ayaqları tədricən uyğunlaşdırmaq daha sağlamdır. Bundan başqa, qalın dabanlı modellər nazik dabanlara nisbətən daha sabit olur və ağırlığı ayağa bərabər paylayır.

Gün ərzində fasilələr vermək də önəmlidir. Uzun müddət ayaq üstə qalmaq ağrını artırır, ona görə də oturub dincəlmək üçün imkan yaratmaq lazımdır. Çantanızda saxlayacağınız jel altlıqlar isə gözlənilməz hallarda ayaqlardakı təzyiqi qısa müddətə azalda bilər.

Aytən