ABŞ sanksiyaları altındakı gəmilər açıq dənizdə saxlanılıb və onlar qeyri-qanuni neft daşınmasında ittiham olunur...
Poliqon xəbər verir ki, Hindistan Sahil Mühafizəsi şənbə günü ABŞ sanksiyaları altına düşmüş üç neft tankerini saxlayıb. Məlumata görə, Nikaraqua bayrağı altında üzən All Jafzia, Mali bayraqlı Asphalt Star və İran bayrağı altında qeydiyyatda olan Stellar Ruby gəmiləri Hindistan sularında nəzarətə götürülüb.
Hindistan rəsmiləri bildiriblər ki, saxlanılan bütün gəmilər qeyri-qanuni neft daşınmasında iştirak etdiklərinə görə ABŞ tərəfindən sanksiyalaşdırılıb. Araşdırma zamanı beynəlxalq miqyaslı neft qaçaqmalçılığı sxeminin ifşa olunduğu açıqlanıb. Həmin sxem çərçivəsində neft yüklərinin açıq dənizdə, birbaşa limanlara daxil olmadan gəmilər arasında ötürüldüyü qeyd olunur.
Rəsmi açıqlamalara görə, bu üsul sanksiyalardan yayınmaq və neftin mənşəyini gizlətmək məqsədi daşıyıb. Hindistan Sahil Mühafizəsi və digər müvafiq qurumlar hazırda saxlanılan tankerlərin marşrutlarını, yük sənədlərini və ekipaj üzvlərinin mümkün əlaqələrini araşdırır.
Analitiklərin fikrincə, hadisə Hind okeanı hövzəsində sanksiyaların pozulması ilə bağlı artan riskləri və dəniz təhlükəsizliyinin gücləndirilməsinin vacibliyini bir daha gündəmə gətirir. Ekspertlər hesab edirlər ki, bu cür əməliyyatlar beynəlxalq enerji bazarında qeyri-şəffaf dövriyyənin qarşısının alınmasına yönəlmiş daha sərt nəzarət tədbirlərinə yol aça bilər.
Poliqon.info
