SpaceX-in qurucusu insanlığın yenidən Ay missiyalarına fəal şəkildə başlamalı olduğunu bildirir...
Poliqon xəbər verir ki, SpaceX şirkətinin qurucusu İlon Mask insanlığın Ay proqramlarına genişmiqyaslı şəkildə qayıtmasının vaxtının çatdığını bəyan edib. Sahibkar bu fikrini X sosial şəbəkəsindəki şəxsi hesabında paylaşdığı qısa, lakin diqqətçəkən açıqlama ilə ifadə edib.
“ Aya genişmiqyaslı qayıdışın vaxtı çatıb”, – deyə İlon Mask yazıb. O, bu sözlərlə digər bir istifadəçinin paylaşımına münasibət bildirib. Həmin paylaşımda ilk təyyarə uçuşu ilə Ay səthinə ilk eniş arasında cəmi 66 il keçdiyi vurğulanırdı. Paylaşımda 1903-cü ildə Rayt qardaşlarının mühərrikli təyyarəsinin fotosu ilə 1969-cu ildə amerikalı astronavt Nil Armstronqun Ay səthində çəkilmiş məşhur şəkli bir kollajda təqdim olunmuşdu.
Maskın açıqlaması ABŞ-nin Ay proqramları ətrafında gedən son müzakirələr fonunda səslənib. Belə ki, fevralın 3-də ABŞ Milli Aeronavtika və Kosmik Tədqiqatlar İdarəsi (NASA) “Artemida II” proqramı çərçivəsində nəzərdə tutulan ikinci missiyanın startını mart ayına təxirə salıb. Buna səbəb “ümumi sınaq” zamanı maye hidrogen sızmasının aşkar edilməsi olub. NASA-da bildirilib ki, sızma raketin əsas pilləsinə kriogen yanacağın ötürülməsi üçün istifadə olunan interfeysdə baş verib.
Bundan əvvəl, yanvar ayında NASA “Orion” kosmik gəmisinin və onu orbitə çıxaracaq SLS daşıyıcı raketinin “Artemida” proqramı üzrə ilk pilotlu Ay missiyası üçün hazırlıq mərhələsinin tamamlandığını açıqlamışdı. Agentliyin məlumatına görə, dörd astronavt Ay ətrafında on günlük uçuş həyata keçirəcək. Bu missiyanın məqsədi gələcəkdə insanların yenidən Ay səthinə enməsinə imkan verəcək sistemlərin sınaqdan keçirilməsidir. Həmin mərhələ “Artemida III” missiyası çərçivəsində planlaşdırılan birbaşa Ay enişinə hazırlıq kimi qiymətləndirilir.
Poliqon.info
