ABŞ Prezidentinin xüsusi elçisi Stiven Uitkoff Birləşmiş Ştatlar və İran arasında keçirilən danışıqlarda iştirak etdiyi Omanı tərk edib.
AFN.az xəbər verir ki, bu barədə TASS agentliyi Maskat Beynəlxalq Hava Limanındakı mənbəsinə istinadən məlumat yayıb.
Hava limanından verilən məlumata görə, xüsusi elçini daşıyan təyyarə artıq Maskatdan havalanıb, lakin uçuşun hara istiqamətləndiyi barədə dəqiq məlumat verilmir. Uitkoffun Omandakı görüşləri bölgədəki gərginliyin azaldılması və ikitərəfli münasibətlərin tənzimlənməsi istiqamətində atılan diplomatik addımların tərkib hissəsi hesab olunur.
Qeyd edək ki, Stiven Uitkoff Maskata cümə axşamı günü, Əbu-Dabidə Ukrayna məsələsi ilə bağlı keçirilən genişmiqyaslı danışıqlar başa çatdıqdan dərhal sonra gəlmişdi. Onun ard-arda reallaşdırdığı bu diplomatik səfərlər ABŞ administrasiyasının həm Avropa, həm də Yaxın Şərqdəki böhranların həllinə yönəlmiş fəallığının göstəricisidir.
