Tərəvəzlərin qaynadılması və qızardılmasının bütün vitaminləri məhv etdiyi mifi dağıtmağın vaxtıdır.
E-saglam.az xəbər verir ki, qidalanma üzrə mütəxəssis Anna Kiriçek bəzi qidaların bişirildikdən sonra daha sağlam hala gəldiyini açıqlayıb.
Buna bariz nümunə pomidorlardır. Onları bişirmək və ya qaynatmaq, hüceyrələri qoruyan güclü bir antioksidan olan likopenin konsentrasiyasını artırır. Bu, həmçinin onların dadını gücləndirir.
"Yerkökü də nəzərə alınmağa dəyər. Bişmiş halda beta-karoten tərkibi nəinki qorunub saxlanılır, həm də daha asan mənimsənilir", - deyə ekspert qeyd edir. Bu, görmə və immunitet üçün vacibdir. İstilik müalicəsi balqabaq, bolqar bibəri və ispanağa da oxşar təsir göstərir və onların vitaminlərini daha asan əldə etməyə imkan verir.
Maksimum qida dəyərini qorumaq üçün mütəxəssis yumşaq bişirmə üsullarından istifadə etməyi tövsiyə edir: pörtləmə, sobada bişirmə, buxarda bişirmə və qısa müddətə qaynatma. Lakin, uzun müddət qaynatma və yüksək istilikdə qızartmadan çəkinmək lazımdır, çünki onlar C vitamini kimi həssas vitaminləri məhv edə bilər.
Tərcümə: Könül Oruc
E-saglam.az
