Naməlum şəxs hərbçini arxadan bir neçə dəfə güllələyib, hadisə ilə bağlı cinayət işi açılıb...
Poliqon xəbər verir ki, Moskvada Rusiya Müdafiə Nazirliyinin general-leytenantı Vladimir Alekseyevə qarşı silahlı hücum həyata keçirilib. Məlumata görə, naməlum şəxs general-leytenantı arxadan bir neçə dəfə güllələdikdən sonra hadisə yerindən qaçıb.
Bildirilir ki, ağır yaralanan hərbçi dərhal xəstəxanaya çatdırılıb və hazırda ona tibbi yardım göstərilir. Onun vəziyyəti ilə bağlı rəsmi məlumat açıqlanmayıb.
Hüquq-mühafizə orqanları faktla bağlı araşdırmalara başlayıb. Rusiya istintaq qurumları hadisə üzrə “qəsdən adam öldürməyə cəhd” və “odlu silahın qanunsuz dövriyyəsi” maddələri ilə cinayət işi qaldırıb. Hücumun motivləri və şübhəli şəxsin kimliyi hələlik açıqlanmayıb.
Məlumata əsasən, hadisə yerində operativ tədbirlər həyata keçirilir, hüquq-mühafizə orqanları hücum edən şəxsin saxlanılması istiqamətində axtarış əməliyyatlarını davam etdirir. Hadisənin başvermə şəraiti, istifadə edilən silahın növü və hücumun planlaşdırılıb-planlaşdırılmadığı istintaq çərçivəsində araşdırılır.
Poliqon.info
