Şirvan Apellyasiya Məhkəməsində maşınla yol qəzası törədərək hadisə yerindən qaçmaqda təqsirləndirilən Bəhmən Səfərovun (soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Pərviz Hacıyevin sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxs və və zərərçəkmiş şəxsin hüquqi varisinin apellyasiya şikayətləri təmin olunmayıb, Lənkəran Ağır Cinayətlər Məhkəməsinin hökmü dəyişdirilib. “Konstitusiya və Suverenlik İli” münasibətilə amnistiya elan edilməsi haqqında” Milli Məclisin 19 dekabr 2025-ci il tarixli Qərarının 19.5, 5.2.3 və 3.1-ci bəndlərinə əsasən, Bəhmən Səfərov hökmlə Cinayət Məcəlləsinin 263.2 və 264-cü maddələri ilə təyin edilmiş 6 il müddətə azadlıqdan məhrumetmə cəzası 6 ay azaldılaraq, onun üzərində qəti olaraq 5 il 6 ay müddətə azadlıqdan məhrumetmə cəzası saxlanılıb.
İttihama görə, hadisə 02 iyul 2024-cü il tarixdə, saat 23 radələrində İmişli-Bəhrəmtəpə avtomobil yolunun İmişli rayonunun Rəsullu kəndindən keçən hissəsində qeydə alınıb.
Belə ki, Bəhmən Səfərov sərxoş vəziyyətdə idarə etdiyi "Toyota Corolla" markalı avtomobili hərəkətdə olarkən piyada Elbrus Şükürovu vurub. Yaralı aldığı xəsarətlər nəticəsində ölüb.
Hadisədən sonra Bəhmən Səfərov hadisə yerindən qaçıb. Daha sonra o, saxlanılaraq cinayət məsuliyyətinə cəlb edilib.
Lənkəran Ağır Cinayətlər Məhkəməsinin hökmü ilə Bəhmən Səfərov 6 il müddətə azadlıqdan məhrum edilmişdi.
Kamal Məmmədov
