Respublikaçılar demokratların xeyrinə mümkün qeyri-qanuni səsvermənin qarşısını almaq üçün sərt addımlara hazırlaşır...
Poliqon xəbər verir ki, ABŞ prezidenti Donald Trampın keçmiş müşaviri Stiv Bennon noyabrda keçiriləcək Konqres seçkiləri ilə bağlı qalmaqallı açıqlama verib. Onun sözlərinə görə, seçkilər zamanı immiqrasiya polisi səsvermə məntəqələrini “əhatəyə ala” bilər. Bennon bu addımın məqsədini qeyri-qanuni miqrantların demokratların xeyrinə səs verməsinin qarşısını almaq kimi izah edib.
Açıqlama ABŞ-də seçki prosesinin legitimliyi ilə bağlı onsuz da gərgin olan siyasi mühiti daha da qızışdırıb. Tənqidçilər bildirirlər ki, belə bir yanaşma seçicilərə təzyiq forması kimi qiymətləndirilə və xüsusilə miqrant icmaları arasında qorxu mühiti yarada bilər. Demokrat düşərgə isə bu cür bəyanatları seçkilərə müdaxilə və seçici fəallığını azaltmaq cəhdi kimi dəyərləndirir.
Müşahidəçilər qeyd edir ki, respublikaçılar bu il hakimiyyəti qoruyub saxlamaq üçün bütün mümkün vasitələrdən istifadə etməyə hazırdırlar. Bu vasitələrin bəzilərinin hüquqi çərçivədə olub-olmaması isə ciddi mübahisələr doğurur. Ekspertlər hesab edirlər ki, immiqrasiya orqanlarının seçki prosesinə cəlb edilməsi ABŞ-də demokratik institutlara inamı sarsıda və hüquqi qarşıdurmalara yol aça bilər.
Qeyd edək ki, ABŞ-də qeyri-qanuni miqrantların səsvermədə iştirakı federal qanunvericiliklə qadağandır və bu cür hallar geniş miqyasda sübut olunmayıb. Buna baxmayaraq, miqrasiya və seçki təhlükəsizliyi mövzusu respublikaçıların siyasi gündəmində mühüm yer tutmaqda davam edir.
Poliqon.info
