Bakı, 5 fevral, AZƏRTAC
“Google” axtarış sisteminin sahibi “Alphabet” korporasiyası süni intellekt sahəsində investisiyalarını artırmağı planlaşdırır.
AZƏRTAC xəbər verir ki, şirkət cari ildə süni intellekt layihələrinə, əsasən də məlumat mərkəzlərinə 175–185 milyard dollar həcmində vəsait ayıracaq. Ötən il bu göstərici 91 milyard dollar təşkil edib.
“Google” süni intellekt sahəsində “OpenAI” və “Meta” ilə rəqabət aparır. Artıq şirkətin “Gemini” süni intellekt xidmətindən ayda 750 milyon insan istifadə edir.
Yüksək investisiya planları çip istehsalçılarına da müsbət təsir göstərib, “Nvidia” və “Broadcom” səhmlərində artım qeydə alınıb. “Alphabet” korporasiyasının əsas maliyyə mənbəyi isə süni intellekt sahəsində reklam biznesidir. 2025-ci ilin son rübündə reklam gəlirləri 82,3 milyard dollara, ümumi mənfəət isə təxminən 34,5 milyard dollara çatıb.
Ekspertlər “Google”nin axtarış sistemində süni intellekt əsaslı xülasələrin artmasının reklam gəlirlərinə mümkün təsirini diqqətlə izləyirlər.
