“Azərbaycan Prezidenti cənab İlham Əliyevə və Ermənistanın Baş naziri Nikol Paşinyana verilən “Zayed İnsan Qardaşlığı Mükafatı” təkcə Azərbaycan və Ermənistan arasında deyil, bütövlükdə bölgədə sülhün bərqərar olması üçündür. Bu, cənab Prezidentin apardığı uzunmüddətli və dayanıqlı siyasətin bəhrəsidir”.
Bu sözləri Pravda.az-a açıqlamasında Milli Məclisin deputatı Cavanşir Paşazadə deyib.
Deputat bildirib ki, Prezident İlham Əliyev daim beynəlxalq tribunalardan Azərbaycan həqiqətlərini dünya ictimaiyyətinə çatdırır: “Əbu-Dabidə təqdim edilən mükafat iki xalqın birgə yaşamasına yönəlikdir. Biz qonşu ölkəyik, köçüb gedə bilməyəcəyik. İndi dövlətlərin iqtisadiyyatı Sovet dönəmindəki kimi deyil. Hər hansı dövlətdə daxili problem varsa, yaxud ətraf ölkədə siyasəti düzgün qura bilmirsə, bu, bütün sahələrə təsir edəcək, təkcə iqtisadiyyatla münasibətləri yoluna qoymaq qeyri-mümkündür. Buna görə də bizə qonşu olan ölkələrlə - İran, Rusiya, Gürcüstan, o cümlədən gələcəkdə Ermənistanla münasibətlər qurmalıyıq. Çünki bölgədə bizi maraqlandıran iqtisadi məsələlər var. Zəngəzur yolu açılandan və logistik məsələlər həllini tapandan sonra Ermənistan da, Xəzəryanı ölkələr də bundan istifadə edəcəklər. Bütün bunlar o deməkdir ki, Azərbaycan artıq bölgədə güclü bir ölkəyə çevrilib. Bölgədə sülhün bərqərar olması Azərbaycandan asılıdır. Bunu xarici ölkələr də görür. “Zayed İnsan Qardaşlığı Mükafatı” kimi mükafatlardan çox olacaq. Allahın izni ilə, xalqımız firavan yaşayacaq. Gələcəkdə ermənilərlə birgəyaşayış üçün bu zəminlər yaradılmalıdır. Birgəyaşayışı istəməyənlər ya siyasətdən bir az kənardırlar, ya da məsələyə həssas yanaşırlar. Vətən müharibəsində şəhidlər verdik, qazilərimiz var. Bu baxımından insanlarımızı da başa düşmək lazımdır. Lakin ermənilərlə birgəyaşayışa siyasi cəhətdən qarşı çıxanlar varsa, bu, düzgün deyil. Onlar bir şeyi başa düşməlidirlər ki, cənab Prezident nə edir, düz edir".
Aytəkin Qardaşova
