Gəncə Ağır Cinayətlər Məhkəməsində yol qəzası törədərək hadisə yerindən qaçmaqda təqsirləndirilən Şəmşəd Muradovun cinayət işi üzrə məhkəmə istintaqı başa çatıb.
Pravda.az-ın əldə etdiyi məlumata görə, hakim İlkin İbişovun sədrliyi ilə keçirilən prosesdə hökm oxunub.
Məhkəmənin hökmü o, 5 il 6 ay müddətə azadlıqdan məhrum edilib və Şəmşəd Muradov dərhal məhkəmə iclas zalında həbs olunub.
İttihama görə, Şəmşəd Muradov sərxoş halda nəqliyyat vasitələrini idarə etmək hüququ olmadan idarə etdiyi digər mexaniki nəqliyyat vasitəsi olan traktorla yol hərəkəti qaydalarını pozaraq ehtiyatsızlıqdan zərərçəkmiş şəxsin ölümünə səbəb olan və yol nəqliyyat hadisəsi yerindən qaçma cinayət əməllərini törədib.
Hadisə 21 iyun 2024-cü il tarixdə, saat 14 radələrində Şəmkir rayonu, Təzəkənd-Qaracəmirli avtomobil yolunun Şəmkir rayonu, Qaracəmirli kəndi ərazisindən keçən hissəsində qeydə alınıb.
Belə ki, Muradov Şəmşəd Fidayıl oğlunun idarə etdiyi "Belarus" markalı traktoru hərəkətdə olarkən Alıyev Səxavət Hakim oğlunun idarə etdiyi "VAZ 2106" markalı avtomobillə toqquşub. Nəticədə Səxavət Alıyev hadisə yerində ölüb. Hadisədən sonra Şəmşəd Muradov ərazidən uzaqlaşıb.
Daha sonra o, saxlanılaraq cinayət məsuliyyətinə cəlb edilib.
Kamal Məmmədov
