Liviya Baş Prokurorluğu devrilmiş lider Müəmmar Qəddafinin oğlu Seyf əl-İslamın ölümü ilə bağlı ilkin təhqiqatın nəticələrini açıqlayıb.
AFN.az xəbər verir ki, prokurorluq onun odlu silahdan açılan atəş nəticəsində öldüyünü rəsmən təsdiq edib.
Qurumun rəsmi sosial şəbəkə hesabında yayılan məlumatda deyilir: "Müəyyən edilmişdir ki, qurban odlu silahla qətlə yetirilib". Hazırda hüquq-mühafizə orqanları cinayət hadisəsi ilə bağlı maddi sübutların toplanması, şübhəli şəxslərin müəyyən edilməsi və cinayət işinin açılması üçün zəruri sənədləşmə işlərinə başlayıb.
Xatırladaq ki, hadisə ölkənin qərbində yerləşən Əz-Zintan şəhərində baş verib. Mərhumun vəkili Xaled əz-Zaydi artıq qətl faktını təsdiqləyib. Mənbələrin bildirdiyinə görə, Seyf əl-İslam öz iqamətgahının bağçasında olarkən dörd nəfərin hücumuna məruz qalıb. Hücum edənlər hadisə yerindən qaçmağa nail olublar.
