Platforma Fransa hüquq-mühafizə orqanlarının addımlarını səlahiyyətdən sui-istifadə kimi qiymətləndirir...
Poliqon xəbər verir ki, X sosial şəbəkəsinin sahibi İlon Mask Fransanın bu platformaya məxsus ofisində aparılan axtarışları “siyasi hücum” kimi dəyərləndirib. Platformanın dövlət qurumları ilə əlaqələrə cavabdeh komandası baş verənlərin onlar üçün gözlənilməz olmadığını bildirib və hüquq-mühafizə orqanlarının hərəkətlərini səlahiyyətlərin aşılması kimi xarakterizə edib.
X platformasının nümayəndələrinin yaydığı açıqlamada qeyd olunub ki, bugünkü reydin əsasını təşkil edən ittihamların heç bir əsası yoxdur və şirkət hər hansı qanun pozuntusunu qəti şəkildə inkar edir. Onların sözlərinə görə, aparılan istintaq tədbirləri platformaya qarşı siyasi motivli təzyiq xarakteri daşıyır.
Fransa prokurorluğu isə bildirib ki, axtarışlar 2025-ci ilin yanvarında başlanmış istintaq çərçivəsində həyata keçirilib. Araşdırma X platformasında süni intellektdən istifadə etməklə, real insanları da əhatə edən pornoqrafik görüntülərin yaradılmasına imkan verən alətin tətbiqi ilə əlaqədar başlanıb. Bundan əlavə, iyul ayında prokurorluq sosial şəbəkədə xarici müdaxilə məqsədilə alqoritmlərin manipulyasiyası şübhəsi ilə cinayət işi açıldığını da açıqlayıb.
Qeyd olunur ki, Fransa prokurorluğu reydin keçirilməsi barədə məhz X platforması vasitəsilə məlumat yayıb. Lakin bu açıqlamadan qısa müddət sonra qurumun sosial şəbəkədəki rəsmi hesabı silinib. Prokurorluq nümayəndələri bildiriblər ki, axtarışlarla bağlı paylaşım edildikdən sonra X-də fəaliyyət göstərən rəsmi profili artıq idarə etməyəcəklər.
Poliqon.info
