İki ölkə Ukraynaya hava hücumundan müdafiə imkanlarının gücləndirilməsi məqsədilə yüz milyonlarla dollar dəyərində birgə paket hazırlayıb...
Poliqon xəbər verir ki, İsveç və Danimarka Ukrayna üçün hava hücumundan müdafiə sistemlərinin birgə satın alınması və tədarükü barədə razılığa gəlib. Qərb mediasının çərşənbə axşamı yaydığı məlumatlara görə, ümumi yardım paketinin həcmi təxminən 290 milyon dollar təşkil edir.
İsveçin müdafiə naziri Pol Yonsonun açıqlamasına əsasən, Stokholm İsveçin BAE Systems konserninin Bofors bölməsi tərəfindən hazırlanmış “Tridon” zenit-raket komplekslərinin alınması üçün 2,1 milyard İsveç kronu, yəni təxminən 234,5 milyon dollar ayıracaq. Danimarka isə bu təşəbbüsə təxminən 500 milyon Danimarka kronu, yəni 55,8 milyon dollar həcmində maliyyə töhfəsi verəcək.
Nazir bildirib ki, bu həcmlər Ukraynaya istək olduğu təqdirdə tam bir HHM batalyonu yerləşdirməyə imkan verəcək. O, bu fikirləri Geteborqda danimarkalı həmkarı Truels Lund Poulsen ilə keçirdiyi birgə mətbuat konfransında səsləndirib.
Pol Yonsonun sözlərinə görə, sözügedən satınalma yalnız Ukraynanın müdafiə qabiliyyətinin gücləndirilməsinə xidmət etmir, eyni zamanda İsveçdə hərbi sənaye istehsal güclərinin möhkəmlənməsinə də töhfə verir. O vurğulayıb ki, bu cür layihələr ölkə daxilində müdafiə sənayesinin davamlı inkişafını təmin edir.
Məlumata görə, “Tridon” sistemləri müasir hava təhdidlərinə, o cümlədən pilotsuz uçuş aparatlarına, qanadlı raketlərə və aşağı hündürlükdə uçan hava hədəflərinə qarşı effektiv mübarizə aparmaq üçün nəzərdə tutulub. Bu sistemlərin Ukraynaya verilməsi ölkənin hava məkanının qorunması baxımından mühüm əhəmiyyət daşıyır.
Poliqon.info
