Fransada X platformasının ofisində axtarış aparılıb
Ajans.az xəbər verir ki, bu barədə BFMTV xəbər yayıb. Axtarışlar prokurorluğun kibercinayətkarlıq bölməsi tərəfindən Fransa Jandarmasının Milli Kiber Bölməsi və Avropolun iştirakı ilə həyata keçirilib. X platforması milyarder Elon Maska məxsusdur. Prokurorluğun açıqlamasında bildirilir ki, axtarışlar platformanın alqoritmləri ilə bağlı istintaq çərçivəsində aparılıb. Qeyd olunub ki, bundan sonra istintaqla bağlı sosial şəbəkələrdə əlavə məlumat paylaşılmayacaq (Le Monde-dan sitat). Xatırladaq ki, 2025-ci ilin yanvarında Fransa Dövlət Prokurorluğu X platformasının alqoritmlərindən xarici müdaxilə məqsədləri üçün istifadə edilməsi ilə bağlı ittihamlardan sonra istintaqa başlayıb. İş iki şikayət əsasında açılıb — onlardan biri Fransa parlamentinin üzvünə, digəri isə yüksək vəzifəli məmura məxsusdur. 2025-ci ilin iyulunda istintaq materialları Fransa polisinə ötürülüb. Elə həmin ay X Fransa hakimiyyətinin ittihamlarını rədd edərək istintaqı “siyasi motivli” adlandırıb. Paris hakimiyyəti platformanın tövsiyə alqoritminə, eləcə də “platformada dərc olunan bütün istifadəçi paylaşımları” ilə bağlı məlumatlara çıxış tələb edib. Bundan əlavə, Elon Maskın xAI şirkəti tərəfindən yaradılan Grok çatbotu da Avropa İttifaqı qurumlarının diqqətini cəlb edib. Avropa Komissiyası istifadəçilərə insanların şəkillərini dəyişdirməyə, o cümlədən erotik xarakterli “deepfake”lər yaratmağa imkan verən süni intellekt aləti ilə bağlı araşdırmaya başlayıb. Reuters agentliyinin məlumatına görə, X platformasına inteqrasiya olunan Grok istifadəçi sorğuları əsasında yarıçılpaq qadınların və yetkinlik yaşına çatmayanların görüntülərini təqdim edib.
