İran lideri Əli Xameneinin müşaviri Əli Şamxani ölkəsindəki uran zənginləşdirilməsi fəaliyyətləri və ABŞ ilə mümkün danışıqlar barədə deyib: "Uranın zənginləşdirilməsi dərəcəsini 60 faizdən 20 faizə endirmək mümkündür".
Şamxani bu sözləri Hizbullaha yaxın olan Əl-Məyadin televiziya kanalına bildirib.
O, İrandan zənginləşdirilmiş uranın çıxarılması üçün heç bir səbəb olmadığını bildirərək deyib: “Mürəkkəb prosedurlara ehtiyac yoxdur. Əgər narahatdırlarsa, uranın zənginləşdirilməsi səviyyəsini 60 faizdən 20 faizə endirmək mümkündür, amma bunun üçün ödəniləcək bir qiymət olmalıdır”.
İranın zənginləşdirilmiş uran ehtiyatı ilə bağlı Şamxani deyib: “Zənginləşdirilmiş uran ehtiyatlarının miqdarı hələ də məlum deyil, çünki onların bir hissəsi dağıntılar altında basdırılıb və onu geri almaq təhlükəli olduğundan, bu istiqamətdə hələlik heç bir cəhd edilməyib”.
İranın yalnız ABŞ ilə danışıqlar apardığını və danışıqların mövzusunun nüvə məsələsi olduğunu xatırladan Şamxani ədalətli əsasda və təhdidlərdən azad şəkildə razılığa gəlməyin mümkün olduğunu bildirib.
ABŞ-ın İrana mümkün hücumu ilə bağlı şərh verən Şamxani ölkəsinə edilən hər hansı bir hücumun böyük bir böhrana çevriləcəyini bildirib.
